وہد گوزیت بَلے۔۔۔یاتاں پش گیجیت)

چندن ساچ

او بان ءُ ماڑیانی موجریں پری
ترا چہ لوگ ءَ ڈن وش نہ بیت
گوں موسمانی گردشاں
پہ ناگمانی ءَ
منی تو ڈیھ ءَ اتکگ ئے
ملور بوتگ ئے
تو زہر کُتہ
ورگ نہ وارتگ اَنت
گوں ہمسراں پہ سیل ءُ سواد
ندارگانی چارگ ءَ نہ رپتگ ئے
تئی چم ارس بوتگ اَنت
تو واب کپتگ ئے
او بان ءُ ماڑیانی موجریں پری
ترا چی ءَ کراچی ءَ چہ ڈن وش نہ بیت
برے برے گوشئے
سلام اود ءِ مردماں
کہ نشتگ انت ءُ زندگی کن انت
نہ سارتیں آپ ہست
نہ اے سی یے
نہ ڈاکٹرے
نہ ٹی وی یے
او شیر رنگ
او ماہیکان
ترا چی ءَ مئے ملک وش نہ بیت
بہشتیں ڈاک ءُ ڈن
سبا ءِ کوش مہلبیں
تیاب ءِ نود گوں نرمیں شنزگاں
اگولیں کامبوانی رم
منی دل ءَ تو انگہ شری ءَ نہ دیستگ اَنت