ﺭﺍﺟﺪﭘﺘﺮ ﺀَ ﺳﺮﺩﺍﺭﺍﻧﯽ ﺭﺍﺟﯽ ﮐِﺮﺩ ۔۔۔ ﺳﯿﻤﯽ ﺑﮩﺮ

نبشتہ کار التاپ بلوچ

ﮔﻮْﺷﻨﺖ ﮐﮧ ﻣﯿﺮ ﻧﺼﯿﺮ ﺧﺎﻥ ﺍﻭﻝ ﺑﮩﺎﺩﺭ ﺀُ ﺯﺍﻧﺘﮑﺎﺭﯾﮟ ﻣﺮﺩﮮ ﺑﯿﺖ۔ ﺁﺋﯽ ﺀَ ﻭﺗﯽ ﮨﺎﮐﻤﯽ ﺀِ ﺑﻨﺪﺍﺗﯽ ﺯﻣﺎﻧﮓ ﺀَ ﻭﺗﯽ ﮐﺶ ﺀُ ﮐِﺮّ ﺀِ ﺗﯿﻮﮔﯿﮟ ﭨﮏ ﺀُ ﮐﺒﯿﻠﮧ ﮔﻮﮞ ﻭﺗﺎ ﮨﻮﺍﺭ ﮐﺘﻨﺖ۔ ﯾﮏ ﻣﮩﮑﻤﯿﮟ ﻟﺸﮑﺮﮮ ﭘﮧ ﻭَﺕ ﺟﻮﮌ ﮐﺖ ﮐﮧ ﺍﮮ ﻟﺸﮑﺮ ﻣﯿﺮ ﻧﺼﯿﺮ ﺧﺎﻥ ﺀِ ﮔﻮْﺍﻧﮑﮯ ﺀَ ﻭﺗﯽ ﮨﻮﻧﺎﻧﯽ ﺭﯾﭽﮕﺎ ﭼَﮏّ ﺀُ ﭘﺪ ﻧﮧ ﺑﻮﺕ۔ ﮔﯿﺸﺘﺮ ﭘﻮﻟﮑﺎﺭﺀُ ﻧﺒﺸﺘﮧ ﮐﺎﺭﺍﻧﯽ ﮔﺸﮓ ﺍِﻧﺖ ﮐﮧ ﺑﻠﻮﭺ ﺗﺎﺭﯾﺦ ﺀِ ﺗﮩﺎ ﺯﺍﻧﺘﮑﺎﺭ ﺗﺮﯾﮟ ﺧﺎﻥ ﻣﯿﺮ ﻧﺼﯿﺮ ﺧﺎﻥ ﺍﻭّﻝ ﺑﻮﺗﮓ۔

ﮨﻤﮯ ﺯﻣﺎﻧﮕﺎﮞ ﻣﺎﮞ ﭘﻨﺠﮕﻮﺭﺀَ ﻣﯿﺮ ﻣﮩﺮ ﺍﻟﻠﮧ ﺧﺎﻥ ﮔﭽﮑﯽ ﺀِ ﺑﯿﺮﺍﻧﯽ ﺀَ ﭘﺪ ﺁﺋﯽ ﺀِ ﻣﺴﺘﺮﯾﮟ ﺑﭻّ ﻣﯿﺮ ﻋﯿﺴﯽٰ ﺧﺎﻥ ﭘﻨﺠﮕﻮﺭ ﺀِ ﺳﺮﺩﺍﺭ ﺟﻮﮌ ﮐﻨﮓ ﺑﯿﺖ، ﺑﻠﺌﮯ ﻣﯿﺮ ﻋﯿﺴﯽٰ ﺧﺎﻥ ﺀِ ﮐﺴﺘﺮﯾﮟ ﺑﺮْﺍﺕ ﺯﻭﺕ ﻣﯿﺮ ﻋﯿﺴﯽٰ ﺧﺎﻥ ﺀَ ﮐُﺸﯿﺖ ﺀُ ﮨﺎﮐﻤﯽ ﺀَ ﻭﺕ ﺯﻭﺭﯾﺖ۔ ﻣﯿﺮ ﻋﯿﺴﯽٰ ﺧﺎﻥ ﺀِ ﺑﭻّ ﻣﯿﺮ ﮐﺮﻡ ﺷﺎﮦ ﺗﭽﯿﺖ ﺀُ ﮐﻼﺕ ﺀَ ﻭﺗﺎ ﺳﺮ ﮐﻨﺖ ﺀُ ﻣﯿﺮ ﻧﺼﯿﺮ ﺧﺎﻥ ﺀِ ﮔﻮْﺭﺍ ﭘﻨﺎﮦ ﺯﻭﺭﯾﺖ ﺀُ ﭘﻨﺠﮕﻮﺭﺀَ ﭼﮧ ﻭﺗﯽ ﻧﺎﮐﻮ ﺀِ ﺳﺮﺩﺍﺭﯼ ﺀِ ﮨﻼﺱ ﮐﻨﮓ ﺀِ ﻭﺍﺳﺘﺎ ﮐُﻤﮏ ﻟﻮﭨﯿﺖ۔ ﻧﺼﯿﺮ ﺧﺎﻥ ﺀَ ﭼﮧ ﭘﯿﺴﺮﺍ ﮨﻤﮯ ﻭﺍﮨﮓ ﺩﺍﺷﺘﮓ ﺍﺕ ﮐﮧ ﺁ ﭘﻨﺠﮕﻮ، ﮐﯿﭻ ﺀُ ﻣﮑﺮﺍﻥ ﺀِ ﺍﻧﺪﮔﮧ ﺩﻣﮕﺎﮞ ﺑﮧ ﮔﯿﭙﺖ، ﮨﻤﮯ ﻭﺍﺳﺘﺎ ﻣﯿﺮ ﻧﺼﯿﺮ ﺧﺎﻥ ﺀَ ﺍﮮ ﻣﻮﻗﻊ ﯾﻠﮧ ﻧﮧ ﺩﺍﺕ ﺀُ ﮔﻮﮞ ﻭﺗﯽ ﻟﺸﮑﺮﺀَ ﭘﻨﺠﮕﻮﺭ ﺀِ ﺳﺮﺍ ﺍُﺭﺵ ﮐﻨﺖ۔ ﺳﺮﺩﺍﺭ ﻣﯿﺮ ﮔﺎﺟﯿﺎﻥ ﺗﭽﯿﺖ ﺩﯾﻢ ﭘﮧ ﺗﻤﭗ ﺀَ ﺳﺮ ﺑﯿﺖ ﺀُ ﭘﻨﺠﮕﻮﺭﺀَ ﻣﯿﺮ ﮐﺮﻡ ﺷﺎﮦ ﮔﭽﮑﯽ ﺳﺮﺩﺍﺭ ﺟﻮﮌ ﮐﻨﮓ ﺑﯿﺖ۔

ﭼﮧ ﻣﯿﺮ ﻧﺼﯿﺮ ﺧﺎﻥ ﺍﻭﻝ ﺀَ ﭘﯿﺶ، ﺀُ ﻧﺼﯿﺮ ﺧﺎﻥ ﺀِ ﺯﻣﺎﻧﮓ ﺀَ ﺍﻭﮞ ﮐﻼﺕ ﺀِ ﮨﺎﮐﻢ ﺍﻭﮔﺎﻧﺴﺘﺎﻥ ﺀِ ﺩﺳﺖﺀِ ﭼﯿﺮﺀَ ﺑﻮﺗﮕﻨﺖ، ﺑﻠﺌﮯ ﻧﺼﯿﺮ ﺧﺎﻥ ﮔﻮﮞ ﺍﻭﮔﺎﻧﺴﺘﺎﻥ ﺀِ ﮨﺎﮐﻢ ﺍﺣﻤﺪ ﺷﺎﮦ ﺍﺑﺪﺍﻟﯽﺀَ ﺑﻼﮨﯿﮟ ﺟﻨﮕﮯ ﮐﻨﺖ ﺀُ ﺑﻠﻮﭺ ﮨﺎﮐﻤﯽ ﺀَ ﭼﮧ ﺍﻭﮔﺎﻧﺴﺘﺎﻥ ﺀِ ﺩﺳﺖ ﺀِ ﭼﯿﺮﺍ ﮐﺸّﯿﺖ۔ ﺍﻟﺒﺘﮧ ﺍﮮ ﮐﺎﺭﺀِ ﻭﺍﺳﺘﮧ ﻧﺼﯿﺮ ﺧﺎﻥ ﮔﻮﮞ ﺍﻭﮔﺎﻧﺴﺘﺎﻥ ﺀِ ﮨﺎﮐﻢ ﺍﺣﻤﺪ ﺷﺎﮦ ﺍﺑﺪﺍﻟﯽ ﺀَ ﭼِﻞّ ﺭﻭﭺ ﺀِ ﺟﻨﮓ ﺀَ ﭘﺪ ﮐﮧَ ﺳﻼﮦ ﮐﻨﺖ، ﻧﺼﯿﺮ ﺧﺎﻥ ﯾﮏ ﺑﺮﺍﺕ ﺯﺗﮑﮯ ﮔﻮﮞ ﺍﺣﻤﺪ ﺷﺎﮦ ﺍﺑﺪﺍﻟﯽ ﺀِ ﺑﭻّ ﺗﯿﻤﻮﺭ ﺷﺎﮦ ﺀَ ﺳﺎﻧﮓ ﺩﻧﺖ۔

ﻧﺼﯿﺮ ﺧﺎﻥ ﺀِ ﻣﺴﺘﺮﯾﮟ ﺭﺩﯾﺎﮞ ﭼﮧ ﯾﮑﮯ ﺍﮮ ﺑﻮﺗﮓ ﮐﮧ ﺁﺋﯽ ﺀَ ﻣﺬﮨﺐ ﺀِ ﻧﺎﻡ ﺀِ ﺳﺮﺍ ﮨﺰﺍﺭﺍﮞ ﺑﻠﻮﭺ ﮐُﺸﺘﮓ۔ ﺍﮮ ﺯﻣﺎﻧﮓ ﺀَ ﻣﮑﺮﺍﻥ ﺀِ ﮐﺴﺎﺱ ﺗﯿﻮﮔﯿﮟ ﺁﺑﺎﺩﯼ ﺫﮔﺮﯼ ﺑﻮﺗﮓ۔ ﻭﺗﯽ ﮨﺎﮐﻤﯽ ﺀِ ﻣﮩﮑﻢ ﮐﻨﮓ ﺀِ ﻭﺍﺳﺘﺎ ﻧﺼﯿﺮ ﺧﺎﻥ ﺀَ ﺗﯿﻮﮔﯿﮟ ﺑﻠﻮﭼﺴﺘﺎﻥ ﺀَ ﮨﻮﻥ ﺭﯾﭽﯽ ﺀُ ﻟُﭧ ﻭ ﭘُﻞ ﺍﻭﮞ ﮐﺘﮓ۔ ﺍﻟﺒﺘﮧ ﻧﺼﯿﺮ ﺧﺎﻥ ﺍﻭﻟﯽ ﺳﺮﺩﺍﺭ ﺑﻮﺗﮓ ﮐﮧ ﺁﺋﯽ ﺀَ ﺗﯿﻮﮔﯿﮟ ﺑﻠﻮﭺ ﺳﺮﮈﮔﺎﺭ ﯾﮏ ﺑُﻨﺠﺎﮨﯽ ﮨﺎﮐﻤﯽ ﯾﮯ ﺀِ ﭼﯿﺮﺍ ﺁﺭﮒ ﺀِ ﺟﮩﺪ ﮐﺘﮓ۔ ﭼِﻞّ ﺳﺎﻝ ﺀِ ﮨﺎﮐﻤﯽ ﺀِ ﺗﮩﺎ ﻧﺼﯿﺮ ﺧﺎﻥ ﺀَ ﺑﺎﺯﯾﮟ ﺟﻨﮓ ﮔﻮﮞ ﺑﻠﻮﭺ ﻗﺒﯿﻠﮩﺎﮞ ﮐﺘﮓ ﺀُ ﮔﻮﮞ ﮈﻧّﯽ ﮨﺎﮐﻤﺎﮞ ﺍﻭﮞ۔

ﮔﻞ ﺧﺎﻥ ﻧﺼﯿﺮ ﻭﺗﯽ ﮐﺘﺎﺏ ﺗﺎﺭﯾﺦ ﺑﻠﻮﭼﺴﺘﺎﻥ ﺗﺎﮐﺪﯾﻢ 105 ﺀَ ﻧﺒﺸﺘﮧ ﮐﻨﺖ ﮐﮧ ﺑﻠﻮﭺ ﮨﮑﻮﻣﺖ ﺀِ ﺍﻭﻟﯽ ﺟﻮﮌ ﮐﻨﻮﮎ ﻣﯿﺮ ﻋﻤﺮ ﻣﯿﺮﻭﺍﻧﯽ ﺑﻮﺗﮓ ﺀُ ﻣﯿﺮ ﺍﺣﻤﺪ ﯾﺎﺭ ﺧﺎﻥ ﺍﻭﻝ ﺀُ ﻣﯿﺮ ﻋﺒﺪﺍﻟﻠﮧ ﺧﺎﻥ ‏( ﻗﮩﺎﺭ ‏) ﺀَ ﻭﺗﯽ ﮨﻮﻧﺎﮞ ﮔﻮﮞ ﺑﻠﻮﭺ ﺀِ ﮨﺎﮐﻤﯽ ﺭﮐّﯿﻨﺘﮓ ﺑﻠﺌﮯ ﻣﯿﺮ ﻧﺼﯿﺮ ﺧﺎﻥ ﺍﻭﻝ ﮨﻤﺎ ﻣﺮﺩﻡ ﺑﻮﺗﮓ ﮐﮧ ﺍﻭﻟﯽ ﺭﻧﺪﺍ ﺑﻠﻮﭺ ﺳﯿﻤﺴﺮ ﺋﮯِ ﭨﺎﮨﯿﻨﺘﮓ ﺀُ ﭘﮩﺎﺯﺗﮓ ﺀُ ﺑﻠﻮﭺ ﮨﺎﮐﻤﯽ ﮐﻠﯿﮟ ﺑﻠﻮﭼﺴﺘﺎﻥﺀَ ﻣﮩﮑﻢ ﮐﺘﮓ۔

ﻧﺼﯿﺮ ﺧﺎﻥ ﺍﻭﻝ ﺀِ ﯾﮏ ﻧﺰﻭﺭﯼ ﯾﮯ ﺍﮮ ﺑﻮﺗﮓ ﮐﮧ ﺁ ﮔﻮﮞ ﻣﺬﮨﺒﯽ ﺟﻨﻮﻥ ﺀَ ﮈﻥﺀَ ﺩﺭ ﺍﺗﮑﮓ ﺀُ ﻣﺬﮨﺐ ﺀِ ﻧﺎﻡ ﺀَ ﮨﺰﺍﺭﺍﮞ ﺑﻠﻮﭺ ﮐُﺸﺘﮓ۔ ﺑﺎﺯﯾﮟ ﺟﺎﮔﮩﺎﮞ ﻭﺗﯽ ﮨﺎﮐﻤﯽﺀِ ﺑﺮﺟﻢ ﺩﺍﺭﮒ ﺀِ ﻭﺍﺳﺘﺎ ﻟُﭧّ ﺀُ ﭘﻞ ﺀِ ﮨﻤﺮﺍﮨﯽﺀَ ﺑﻠﻮﭺ ﮈﯾﮩﺎﻧﯽ ﺳﺮﺍ ﺍﺭﺵ ﮐﺘﮓ ﺀُ ﺑﺎﺯﯾﻨﮯ ﮐُﺸﺘﮓ۔ ﺑﻠﮯ ﺭﺍﺟﺪﭘﺘﺮﺀَ ﺍﮮ ﮨﺒﺮ ﭼﻮ ﺩﺭﭘﺸﻨﺎﮐﯿﮟ ﺍﺳﺘﺎﻝ ﺀَ ﺍﺳﺖ ﺍِﻧﺖ ﮐﮧ ﭼﮧ ﺍﻭﮔﺎﻧﺴﺘﺎﻥ ﺀِ ﺷﺎﮨﺎﮞ ﺑﻠﻮﭺ ﮨﺎﮐﻤﯽ ﺀِ ﺁﺟﻮ ﮐﻨﻮﮎ ﮨﻢ ﮨﻤﺎ ﺑﻮﺗﮓ۔ ﭼﮧ ﻧﺼﯿﺮﺧﺎﻥ ﺍﻭﻝ ﺀَ ﭘﯿﺴﺮ ﺑﻠﻮﭼﺴﺘﺎﻥ ﺀُ ﮐﺸﻤﯿﺮ ﺀِ ﺳﺮﺍ ﺍﻭﮔﺎﻧﺴﺘﺎﻥ ﺀِ ﺷﺎﮦ ﺀِ ﮨﺎﮐﻤﯽ ﺑﻮﺗﮓ ﺀُ ﮨﺮ ﺧﺎﻧﮯ ﮐﮧ ﭘﮧ ﮐﻼﺕ ‏( ﺑﻠﻮﭼﺴﺘﺎﻥ ‏) ﺀَ ﺩﺍﺭﮒ  ﺑﻮﺗﮓ  ﯾﺎ  ﺑﻠﻮﭼﺴﺘﺎﻥ ﺀ ِ ﺍﻧﺪﮔﮧ  ﮨﻨﺪﺍﮞ  ﮐﮧ  ﯾﮏ ﺳﺮﻭﮐﮯ ﺩﺍﺭﮒ ﺑﻮﺗﮓ ،ﮔﮍﺍ ﺍﻟﻢ ﺍﻭﮔﺎﻧﺴﺘﺎﻥ ﺀِ ﺷﺎﮦ ﺀِ ﺭﺯﺍ ﻣﻨﺪﯼ ﺀُ ﻣﻨﺸﺎﺀ ﮨﻮﺍﺭ ﺑﻮﺗﮓ۔ ﺑﻠﺌﮯ ﻧﺼﯿﺮ ﺧﺎﻥﺀِ ﺟﮩﺪ ﺀُ ﻗﺮﺑﺎﻧﯿﺎﮞ ﭘﺪ ﺑﻠﻮﭺ ﭼﮧ ﺍﻭﮔﺎﻧﺴﺘﺎﻥ ﺀِ ﺍﺛﺮﺀَ ﺁﺟﻮ ﺑﻮﺗﮓ.روان

دلگوش۔۔اے نبشتانکءِ تہا لیکیتگیں درائیں لبز  لیکوک ئیگ انت ۔

ایشاں اوں بوانیت۔

ﺭﺍﺟﺪﭘﺘﺮ ﺀَ ﺳﺮﺩﺍﺭﺍﻧﯽ ﺭﺍﺟﯽ ﮐﺮﺩ ۔۔۔ ﺍﻭﻟﯽ ﺑﮩر 

ﺭﺍﺟﺪﭘﺘﺮ ﺀَ ﺳﺮﺩﺍﺭﺍﻧﯽ ﺭﺍﺟﯽ ﮐﺮﺩ ۔۔۔ ﺩﻭﻣﯽ ﺑﮩﺮ