ممبئی: بالی ووڈ اداکارہ سوناکشی سنہا انڈسٹری میں ڈیبیو کرنے والے مسلمان اداکار کی محبت میں گرفتار ہوگئیں۔
بھارتی میڈیا کی رپورٹس کے مطابق دبنگ اداکارہ سلمان خان کی نئی فلم ’نوٹ بک‘ میں ڈیبیو کرنے والے مسلمان اداکار ظہیر اقبال کے ساتھ نظر آرہی ہیں اور دونوں اداکاروں کے درمیان قربتیں بڑھ گئیں۔
رپورٹ میں دعویٰ کیا گیا ہے کہ سوناکشی سنہا ظہیر اقبال کی محبت میں گرفتار ہوچکیں اور وہ اُن سے شادی کرنا چاہتی ہیں۔
بالی ووڈ میں یہ خبریں بھی زیرگردش ہیں کہ سوناکشی اور ظہیر کی دوستی کروانے میں دبنگ خان نے اہم کردار ادا کیا کیونکہ دونوں کو پہلی بار سلمان خان کے گھر پر ہی ایک ساتھ دیکھا گیا۔
سلمان خان نے گزشتہ ماہ اپنی سالگرہ کی تقریب کا انعقاد کیا تھا جس میں بالی ووڈ کی معروف شخصیات نے بھی شرکت کی تھی۔
تقریب میں سوناکشی اور ظہیر اقبال بھی شریک تھے اور دونوں ایک دوسرے کے ساتھ ہی نظر آرہے تھے۔
یاد رہے کہ ظہیر اقبال نئی آنے والی فلم ’نوٹ بک‘ سے انڈسٹری میں ڈیبیو کرررہے ہیں جبکہ اُن کی سلمان خان سے بہترین دوستی بھی ہوچکی۔
نوٹ بک رومانوی فلم ہے جس میں ظہیر اقبال اور منیش بہل کی صاحبزادی پرانوتن مرکزی کردار ادا کریں گے، فلم 29 مارچ کو ریلیز کیے جانے کا امکان ہے۔
دوسری جانب سوناکشی اپنی نئی آنے والی فلم ’ویلکم ٹو نیویارک‘ کی شوٹنگ میں مصروف ہیں جس میں اُن کے ساتھ دلجیت ووسنج، بومن ایرانی، کرن جوہر، رتیش دیش مکھ اور لارا دتہ کردار ادا کرتے نظر آئیں گے۔
چکری تولیتی کی ہدایت کاری میں بنائی جانے والی ’ویلکم ٹو نیویارک‘ 23 فروری کو ریلیز کی جائے گی، فلم میں سلمان خان اداکارہ سوناکشی سنہا کے ساتھ ’نین پھسل گئے‘ گانے میں بھی نظر آئیں گے۔
واضح رہے کہ بالی ووڈ اداکارہ سوناکشی سنہا نے سپر اسٹار سلمان خان کے ساتھ 2010 میں ریلیز ہونے والی بلاک بسٹر فلم’’دبنگ‘‘ سے اپنے کیرئیر کی شروعات کی تھی اور فلم کے سیکوئل ’’ دبنگ 2‘‘ میں بھی اداکارہ نے مرکزی کردار ادا کیا تھا۔
بھارتی میڈیا کے مطابق سوناکشی سنہا کو دبنگ کے تیسرے سیکوئل میں بھی اداکاری کے جوہر دکھانے کی پیش کش کی جاچکی ہے، فلم کے پروڈیوسر ارباز خان کا کہنا تھا کہ دبنگ تھری کا اسکرپٹ تیار ہے اور جلد ہی اس کی شوٹنگ کا آغاز کردیا جائے گا۔
