امارات: بلاوجہ باہر نکلنے پر 544 ڈالر جرمانہ

متحدہ عرب امارات میں دن میں بغیر کسی ضروری وجہ کے گھروں سے نکلنے پر 544 امریکی ڈالر جرمانہ کیا جائے گا۔

متحدہ عرب امارات کی سرکاری نیوز ایجنسی (وام)کے مطابق حکام نے کہا ہے کہ جو لوگ دن میں بغیر کسی ضروری وجہ کے اپنے گھروں سے نکلیں گے خواہ اس وقت کرفیو کے اوقات نہ بھی نافذ ہوں تو بھی انہیں جرمانہ ہوگا۔

حکام کے مطابق لوگوں کو ہنگامی صورتِ حال، کام کے لیے، کھانا یا طبی سامان خریدنے کے لیے باہر نکلنے کی اجازت ہے۔

مزید پڑھیں

• 
  مصر میں افواہ پھیلانے پر سزا ہوگی
• 
  امارات میں نوجوان کورونا کا شکار کیوں؟
• 
  ہنگامی حالات میں کرفیو سےاستثنیٰ کیسے؟

متحدہ عرب امارات میں قومی ڈس انفیکشن پروگرام جاری ہے جس کے تحت جراثیم کش سپرے کیا جا رہا ہے۔

لوگوں کو مقامی وقت کے مطابق رات آٹھ بجے سے صبح چھ بجے کے دوران بغیر اجازت گھر سے باہر نکلنے کی اجازت نہیں ہے۔

حکام نے اعلان کیا ہے کہ وہ ان اوقات کے دوران عوامی مقامات پر جراثیم کش کیمیکل کا چھڑکاؤ کریں گے۔

امارات میں جراثیم کش سپرے کیا جا رہا ہے۔ فائل فوٹو: گلف نیوز

واضح رہے کہ متحدہ عرب امارات میں اس سے قبل قومی ڈس انفیکشن پروگرام  26 سے 29 مارچ کی صبح تک کیا گیا تھا۔

لیکن اب حکومت نے اس پروگرام میں 5 اپریل تک توسیع کر دی ہے۔

حکام نے رات کے وقت کرفیو کی خلاف ورزی کرنے والے افراد پر سخت جرمانے عائد کیے ہیں۔

متحدہ عرب امارات میں اب تک کورونا وائرس کے 570 کیس سامنے آئے ہیں جن میں تین افراد ہلاک جبکہ 58 شفایاب ہوئے ہیں۔