ساجد هُسئین سویڈنا بێگواه اِنت

بلۆچستان‌ٹایمزۓ سَرشۆنکار، بلۆچی زبانۓ لبزانت و انگرێزی زبانۓ نامیێن بلۆچ اهوالکار ساجد هُسئین چه 2 مارچا بێگواه اِنت.

ساجدا 2007آ اهوالکاری  بندات کرتگ. پێسرا ڈئیلی ٹایمز و پدا گۆن دی نیوز انٹرنئیشنلا بندۆک بوتگ. ساجدۓ گۆن انگرێزی رۆتاکان اهوالکاریۓ اے سَپر تان 2012آ برجم بوتگ. ای نیاما ساجدا انگرێزی زبانا بلوچستانۓ بازێن سرهالانی سرا نبشته کرتگ. اے نبشتهانی تها بلۆچستانۓ جاوَر، مردمانی گار و بێگواه کنگا ابێد نشهی چێزانی نامیێن باپاری امام بیلۓ سرا نبشته هم هئوار اَنت. ساجدا بلۆچ سیاسی رهشۆن و نبشته‌کارانی زندنامگ هم انگرێزیا نبشته کرتگ‌اَنت که اشانی تها اکبر بگٹی، گُلام مهمد بلۆچ و اَتا شادۓ سرا آییۓ نبشته مشهور بوتنت.

ساجدا بلۆچی لبزانکۓ تهر، لیلۆ و سِپَتۓ سرا هم انگرێزیا نبشته کرتگ و بلۆچ سرڈگارا آم بلۆچۓ زندگیا بگر تان جِنّ و پریانی کسّهان درا آ ییا بازێن سرهالانی سرا نبشته کْرتگ.

انگرێزیا اهوالکاریا ابێد ساجدا بلۆچی زبانا رجانک هم کرتگ و کِسّه، نَگد، چمشانک، سَپرنامه، سیاسی و چاگردی نبشتانک هم نبشته کرتگ.

ساجد 2012آ چه ملکا در آتکگ. تان 2017ۓ ستَمبرا مشکت، دبئیی و یوگنڈایا بوتگ. چه 2017ۓ ستمبرا سویڈنا جهمنند بوتگ. 2019آ سوێڈنا ساجدۓ پناهندگیۓ کێس کبول کرتگ و سئے سالۓ پناهگیری کاگد داتگ.

ستمبر 2017آ انچۆ که ساجد سویڈنا رسیت، گۆن اوپسالا یونیورسٹیۓ بلۆچی زبانۓ پرۆجِکٹا همکاری بنداتَ کنت. یونیورسٹیا 15 سالا گێش بوتگ که بلۆچی انگرێزی، انگرێزی بلۆچی لبزبلدے ناسرمجا اێر بوتگ. اے کار ساجدا دئیگ بوت و ساجدا سئے ماها اے لبزبلدۓ آنلاین ورژنے تئیار کرت که چه 8 هزارا گێش لبزی مان.

ساجدا اے کار که چۆ زوت سرجم کرت، ته یونیورسٹیۓ مردمان دیست که ساجد کاری مردمے، ته کارینا جهانیا ساجد سَلاه جت که بلۆچیا اِم اۓ ۓ واستا داخله بزوریت تانکه زوت بلۆچیا پی اِچ ڈی کرت بکنت.

ساجدا 2020آ اوپسالا یونیورسٹیا بلۆچیا اِم اۓ کنگۓ واستا داخله زُرت و نون کلاسی بئیگا اتنت.

بێگواهی

ساجدا که اوپسالا یونیورسٹیا داخله زورت ته زانتی که هر رۆچ چه اسٹکهُلما تان اوپسالاها رئوگ و آیگ بوتَ نکنت. اوپسالاها یک سْٹوڈنٹی کۆٹیے شۆهازی کرت.

دو مارچا، سُهبۓ کِساس 11 بجا چه وتی سنگتانی کِرّا در آتک و وتی جندۓ کۆٹیا، اوپسالاها شُت. نێمرۆچۓ کساس 2 بجا گۆن وتی سنگتێا پئونا هبری کرتگ. چه اِشیا و رند ساجدۓ پئون بند بوتگ.

وهدے سنگتان دیستگ که پئونی بند اِنت، دومی سهبا، 3 مارچا شتگ‌اَنت اوپسالاها آییۓ شۆهازا، بله گِندَگ نبوتگ. 3 مارچۓ شپا سنگتان اوپسالاۓ پولیس پئون کرتگ و هال داتگ که ساجد گِندَگ بئیگا نه‌اِنت. پولیسا کێس نزرتگ که سویڈنا همک سال، گێشتر زمستانا، کساس 9000 مردم گارَ بیت و پدا کمے وهدێا رَند سجها واپسَ کایَنت.

چار مارچا سنگتان ساجدۓ بێگواهیۓ هال مِسِنگ پیپَل نامێن ادارهێا دات. ای اداره گار و بێگواهێن مردمانی شۆهازگۓ کارا کنت و اے رنگێن کێسانی سرا گۆن پولیسا همکار اِنت.

پَنچ مارچا مِسِنگ پیپَلا ساجدۓ کێس وتی وِبساییٹا شِنگ کرت و همے رۆچا پولیسا هم کێس درج کرت.

چه 2 مارچا بگر تان اے ساهتا ساجد بێگواه اِنت و کَسَّ نزانت که کجا اِنت. سویڈنۓ پولیس همے گپۓ سرا اۆشتاتگ که مۓ سجهێن پَٹّ و پۆل په رازداریَ بیت و هچ گوَ‍شگا نه‌اِنت گۆن که پولیس چے کنگا اِنت.

ما اے سجهێن گپان ادا پمێشکا شِنگ کنگا اێن که ساجدۓ پجارۆک و دۆزواه په ساجدۓ سلامتیا پرێشان و دِلوارگ اَنت و آهان اے هَکّ هست‌اِنت که اے سجهێن گپان سرپد ببنت.

مۓ گۆن ساجدۓ دۆست و دۆزواهان دَزبندی اِنت که اے گرانێن ساهتا اۆپار بکننت و په ساجدۓ سلامتی و وژنامیا دْوا بکننت