بہزاد مصری نے مبینہ طور پر گیم آف تھرون کے ایپی سوڈز کی چرائی گئی ویڈیوز اور پانچ اسکرپٹس کے کچھ حصے اس ویب سائٹ پر پوسٹ کر دیئے تھے جسے وہ کنٹرول کرتا تھا۔
واشنگٹن —
امریکی پراسیکیوٹرز نے ایک ایرانی پر اس سال کے شروع میں کیبل ٹی وی چینل ایچ بی او کے مقبول پروگرام گیم آف تھرونزکے بارے میں معلومات چرانے اور کمپنی سے لاکھوں ڈالر غصب کی کوشش کرنے کی بنا پر اس کے خلاف چینل کے کمپیوٹر سسٹمز میں در اندازی کا الزام لگا یا ہے۔
منگل کے روز 29 سالہ بہزاد مصری پر عائد کی جانے والی فرد جرم پراسیکیوٹرز کی جانب سے اس کے لیے اور ان دوسروں کے لیے جو امریکی کمپنیوں یا افراد کا استحصال کر سکتے ہیں، ایک انتباہ کے ساتھ سامنے آئی۔
نیویارک کے سدرن ڈسٹرکٹ کے قائم مقام اٹارنی جون ایچ کم کہتے ہیں کہ مصری کو اور انٹر نیٹ پر ہیکنگ اور اس سے متعلقہ دوسرے جرائم کرنے والوں کو یہ جان لینا چاہیے کہ وہ دنیا بھر میں کہیں بھی بیٹھے ہوں اپنے کمپیوٹر کی سکرین پر کوئی بھی سائبر جرم کرنے کے بعد محفوظ نہیں رہ سکتے۔ اگر آپ ہمارے لوگوں کو ہیک کریں گے تو ہم آپ کا پتا لگانے کی ہر ممکن کوشش کریں گے اور آپ پر الزام عائد کریں گے اور کسی نہ کسی مرحلے پر ہم آپ کو گرفتار کریں گے اور آپ کو انصاف کے کٹہرے میں لا کھڑا کریں گے۔
جب ایچ بی او نے مصری کی اس ای میل کو مسترد کر دیا جس میں اس نے کمپنی سے لاکھوں ڈالر ز غصب کرنے کی کوشش کی تھی، تو اس نے مبینہ طور پر گیم آف تھرون کے ایپی سوڈز کی چرائی گئی ویڈیوز اور پانچ اسکرپٹس کے کچھ حصے اس ویب سائٹ پر پوسٹ کر دیئے تھے جسے وہ کنٹرول کرتا تھا۔
مصری کو گرفتار نہیں کیا گیا ہے اور اسے متعدد الزامات کا سامنا ہے جن میں وائر فراڈ کا ایک الزام شامل ہے جس کی زیادہ سے زیادہ سزا بیس سال قید ہوتی ہے اور اس کے ساتھ ساتھ اس پر کمپیوٹر کی ایک بار ہیکنگ کا الزام بھی شامل ہے جس پر اس پانچ سال تک قید کی سزا ہو سکتی ہے۔
یہ فرد جرم ان متعدد واقعات میں سے ایک ہے جن میں ایرانی ملوث ہیں۔ جولائی میں محکمہ انصاف نے ورمونٹ میں قائم سافٹ ویئر کی ایک کمپنی کی ہیکنگ پر دو ایرانی شہریوں کے خلاف فرد جرم عائد کی تھی۔
بشکریہ VOAاردو
