" The Unforgettables "

" اِرپان مھر "

8 فروری 1941 ءَ سری گَنگانگر (راجستان) ءَ اَمر سنگھ ءِ لوگ ءَ نُنُّکے ءِ گِریوگ ءِ تَوار اَتک ءُ میتگ ءَ ھالے شِنگ بوت کہ " بچن کور " چُکّ مات بوتگ.

 اے نُنُک ءِ گریوگانی تَوار " جگت پریم " ئیگ اِتاں کہ لوگ ءَ " جیت " ءِ نام پِر اَت ئے ءُ رَندا نامے جگجیت بوت ءُ چہ پِت ءَ پدا جگجیت سنگھ بوت.

جگجیت ءِ پِت ءَ وَت ءَ میوزک ءِ سکّ شَوک بوتگ ءُ زَمانگے وَت ھَم " بَجن " گُشتگے. پدا آئی ءَ وتی دْرائیں چُکّ میوزک ءِ نیمگ ءَ آورتگاں بلئے اَبیدِ جگجیت ءَ آ دگے براتانی گوما میوزک نہ بوت ءُ آیاں یل دات.

جگجیت ءَ گنگانگر ءَ بکشی ٹاہب اسکول ءِ چَت ءَ اُستاد " پنڈت چھگن لال شرما " ءِ کلب ءَ داں دو سال ءَ کمو باز ساز ءُ باجا ءِ جنئگ سِک اِت. اِیشی ءَ چہ رند گُڑا جگجیت ءَ مستریں ءُ سرپدیں اُستادے ءِ شوھاز کنگ بِندات کُت گُڑا یکے ءَ گُشت " جے پور " ءَ "  جَمال خان " شریں سرپدیں اُستادے کہ روایل پیلیس ءَ گانا جَنت. گُڑا جگجیت ھَمائی ءِ کِرا شُت. آئی ءَ آواز گوشداشت ءُ گُشتے شریں ترا سوج دیاں.

جگجیت ءَ اولی رندا 1956 ءَ " گنگانگر " ءَ اسٹیج ءِ سرا مردمانی دیم ءَ گانا جت گُڑا مزنیں مزنیں مردم نِندوک اَتاں کہ آیاں سکّ دوست بوت.

جگجیت گُشیت! ھَمے اولی گانا ءِ سرا مَناں مردماں چہ یک یک دو دو کلدار ءِ ھساب ءَ 125 کلدار رَستگ کہ اے مَنی زِندگی ءِ اولی سوبمندی بوتگ کہ منی واستہ مَردماں اِنچو چاپ جَتگ ءُ مناں اِنچو دلبڈی داتگ.

جگجیت ءِ کستریں برات "کارتر سنگھ " گُشیت کہ 1965 ءَ مارا کَسّ ءَ را ھالے نہ داتگ ءُ ایوک ءَ " بمبی " ءَ شُتگ ءُ نئے کہ پِت یا مئے کِرا زَر ءُ چیزے لوٹ اِتگے. ھَمے کسانیں کسانیں مھپلانی سد دوسد کلدارے گون بوتگاں ءُ شُتگ. اودا کُجا بوتگ ءُ چون بوتگ ما ھِچ سَھی نہ اِیں.

جگجیت گُشیت " ھَردَمَن بوگل " منی سنگتے بوتگ ھَمائی مناں مُدام گُشتگ کہ برو بمبی ءَ برو بمبی ءَ پدا مَن کہ بمبی ءَ اَتکاں ءُ  مَنی زَر ھَلاس بوت آں من ھَما فون کُت ءُ گُشت کہ مَن بمبی ءَ وَ اَتکگاں بلئے زَر ھلاس اَنت. ھَمائی ءَ مناں داں شش ھَپت ماہ ءَ دوسد کلدار ماھے دیم داتگ ـ

جگجیت ءَ اولی رَندا 1973 ءَ گوں چِترا ءَ " باسو بٹاچاریہ " ءِ سوجکاری ءَ جوڑ بوتگیں  فلم " آیوشکار " ءَ چیزے ءِ گُشگ ءَ لوٹائینگ بوت.

پدا جگجیت ءَ را دگے فلمانی واستہ گانا جنئگ واستہ گُشگ بوان بوت.  

اَنچو پدا جگجیت ءَ 1982  ءَ فلم " ساتھ ساتھ " ءِ واستہ " تم کو دیکھا تو یہ خیال آیا " گانا گُشت.

پدا 1982 ءَ " اَرت " فلم ءِ واستہ "  تم اتنا جو مسکرا رہے ہو " گانا گُشت ئے ءُ ھَمے وڑا پدا بازیں فلمانی واستہ گانا جنئگ ءَ لوٹائینگ بوت.

1976 ءَ جگجیت ءِ اولی کیسٹ " THE UNFORGETTABLE " اَتک. پہ گزل گوشداروکاں یک نوکیں رَنگے ءَ اَت کہ نوکیں ساز ءُ سروزانی گوما گزل گُشگ بوھگ اَت.

1988 ءَ گُلزار ءِ سوجکاری ءَ چہ جوڑ بوتگیں غالب ءِ ڈرامہ ئے " مِرزا غالب " ءِ نام ءَ جوڑ بوت کہ اِے ڈرامہ ءِ دْرائیں گزل جگجیت ءُ چترا سنِگھ ءَ گُشتگ اَنت. پدا غالب ءِ گزلانی گُشگ ءَ گوں جگجیت ءَ گیشتر نام کَٹ اِت.

پدا 1991 ءَ علی سردار جعفری ءِ سریل " کھکشان " ءَ جگجیت ءَ وَت میوزک دات ءُ وَت گانا ئے جت. 

ھَمے مْیان ءَ گوں لتا منگیشکر  " سَجدہ " ءِ نام ءَ کیسٹے کُت ئے کہ پہ گوشداروک آں نوکیں چیزے اَت ـ 

ھِندوستان ءَ گزل ءِ توکا نوکیں ساز ءُ رِدھم آں گوں گزل گُشگ ءِ رِپک ءِ آروک اوں جگجیت گُشگ بیت

2003 ءَ ھندوستان ءِ ھکومت ءِ نیمگ ءَ چہ جگجیت ءَ را " پدم بھوش " داد ھم دیگ بوت.

چِترا سنگھ گُشیت! جگجیت من اولی رندا دیستگ کہ تُرندیں پینٹ ئے پادا بوتگے کہ آئی گوما روھگ نہ بوتگ. مَن وتی ھَمساھگ ءِ لوگ ءَ آئی ءِ توار اِیش کُتگ کہ گانا جنئگ ءَ بوتگ گُڑا گانا ءَ رند لوگ ءِ چت ءَ اَتکگ اَت ءُ من وتی لوگ ءِ چَت ءَ اوشتاتگ اِتاں ھَمودا اولی رندا دیست کہ ھَمدا کمو اَتک ءُ چَکرے جَت ئے ءُ پدا شُت.

چِترا گُشیت کہ جگجیت داں دیراں ھَمدا مئے ھَمساھگ ءِ لوگ ءَ بوتگ گُڑا ما یک گانائے ءِ ریکاڈینگ ءِ سرا ھَمدا دُچار کَپتگ اِیں ءُ پدا مئے مھر ءِ سَپر روان بوت.ءُ پدا 1969 ءَ مـا سور کُت.

بِنڈرا (انڈیا) ءَ دیوانے ءَ شارجہ ءِ شیخ " عبدل اَنم مُکاتِر " اَتکگ اَت. گُڑا شَپ ءَ دیوانے ٹھینتگ ءَ اَت ئے. گُڑا ھَمدا اَتکگیں سنگت " اَنجو مائیندو " ءَ پرمائیش کُتگ اَت کہ " درد سے میرا دامن بھر دے یا اللّہ " ءَ بہ جن.

گُڑا جگجیت ءَ گُشت کہ مَرچی اے گانا ءَ بِل، مَرچی اے گانا ءِ مَنی موڑ نہ اِیں دگے روچے ایشی ءَ گُشاں. بلئے بازیں مردمانی گُشگ ءَ رند گُڑا جگجیت ءَ اے گانا جَت.

دیپک پنڈت(جگجیت ءِ سروزی) گُشیت کہ اے گانا ءِ جنئگ ءَ جگجیت اسٹیج ءِ سرا سَکّ گریوگ ءَ اَت گُڑا ما سکّ دگے وڑ بوھگ ءَ اَتیں کہ ھِچ جیڑہ ءُ مسلہ نیست چی ءَ گریوگ ءَ اِیں. گُڑا من جُست کُت کہ چے بوتگ سر؟

گُڑا جگجیت ءَ گُشت کہ بس اے گزل ءِ گُشگ ءَ دل دگے وَڑ بئیگ ءَ اِیں.

ءُ پَدا رندا ھَمے شَپ ءِ دو یا سئے  بَج ءَ ھَال اَتک کہ جگجیت ءِ بچک " وویوک " (بابو) گاڈی اکسینڈنٹ ءَ بیران بوتگ.

" کُلدیپ دیسائی " گَپ جَنت کہ ھَمے شپ ءِ دیوان ءَ رَند ما دومی روچ ءَ پدا جگجیت ءِ کِرا شُتاں گُڑا وتی چشمہ ئے کَشت ءُ دیم ءَ دَور دات ءُ گُشت ئے کُلدیپ یار مَنی دعا کبول بوت ءُ چَمّے اَرس بوت آں.

جگجیت ءِ بچک " وویوک (بابو) کہ اُمرے 20 سال اَت. 28 جولائی 1990 ءَ " نَتراج ھوٹل " ءِ دیم ءَ گاڈی ءِ اکسینڈنٹ ءَ بیران بوت. 

ءُ پدا ھمے وھیلءَ چہ پد جگجیت ءِ جنین چِترا سنگھ ءَ گانا ءِ جنئگ یل دات.

بلئے جگجیت گوں پُرشتگیں دل ءَ دنیا ءِ دیم ءَ اَنگہ بِچکندان ءُ گوں وتی توار ءَ گزلانی گوما مردماں مُلما کنگ ءَ اَت.

جگجیت ءِ واستہ وتی چُکّ ءِ مَرگ ءَ چہ بے ھال بوھگ گران اَت.ھَمے جیڑگانی تہ ءَ جنوری 1998 ءَ آئی ءَ دل دَورہ ءَ گِپت. اکتوبر 2007 ءَ بلڈ پریشر ءِ گیش بوھگ ءَ اسپتال ءَ داکل کنگ بوتگ ءَ اَت. جگجیت ھَمے جیڑھاں گوں مان گیشّ اِتگ ءَ اَت کہ 2009 ءَ چترا سنگھ ءِ پیسری مرد ءَ چہ ءُ جگجیت ءِ چُکّوئیں جنک " مونیکا " ءَ وتکُشی کُت.

مونیکا چترا ءِ پیسری مرد ءِ چُکّ اَت بلئے جگجیت ءِ گوما سکّ باز نزیک اَت.  پیسرا بچک ءِ مَرگ ءُ پدا جَنک ءِ مَرگ ءَ جگجیت توکا چہ سکّ پروشت.

بازیں جیڑگانی سبب ءَ جگجیت مُدام بیمار بوان بوت..

23 ستمبر 2011 ءِ روچ ءَ اناگہ ءَ جگجیت ءِ بلیڈ پریشر اَنچو بُرز بوت کہ آئی ءِ دماگ ءِ رَگ تْرک اِت ءُ آ ممبی ءَ " لِیلاوتی " اسپتال ءَ برگ بوت. 24 ستمبر ءَ ڈاکٹراں آئی ءِ دماگ ءِ آپریش کُت ءُ آئی ءِ دماگ ءِ بَدّاِتگیں ھون کَشت اَنت. بلئے اَنگہ بے ھوش اَت ءُ تَنیگہ ICU ءَ اَت ..

دو شَمبے ءِ روچ ءَ 70 سال ءِ اُمر ءَ 10 اکتوبر 2011 ءَ دو ھَپتگ ءِ بے ھوشی ءَ رَند جگجیت ءِ بیرانی ءِ ھال ءَ آئی ءِ دْرائیں شیدائی ملور کُت اَنت.

کَول ئے گُلزار ئیگ ءَ آئی ءِ زِندگی گْوازئینگ ءِ وتی اندازے اَت ءُ اَنچو روھگ ءِ اَنداز اوں آئی ءِ وتیگ اَت.

" روھگ ءِ وھد ءَ گِندوکی ئے نہ کُت ، دَستے نہ مِلّارنت، ءُ نہ گُشتے کہ مَن روھگ ءَ یاں "