نبشتہ کار: فدا موسٰی
دگنیائے تہءَ چشیں بازیں مردم پیداک بوتگ کہ آہاں وتی زند ء َپہ وتی قوم ءُ زبان ءُ لبزانک ءِ ہاترا ہمینچو جُہدء ُجپا کشّ اِتگ کہ مردم آہان ہجبر شموشت نہ کنت پرچہ کہ آہاں ہرچ کارءِ کہ کرتگ تہنا پہ وتی زاتءَ نہ کرتگ بلکہ پہ قومء ُ راجے ہاترا کرتگ۔
چہ ہمے نام آں یک نامءِ شہید زاہد آسکانیءِ گندگءَ کئیت انت، شہید زاہد آسکانی 2جنوری1979پنجگورے دمگ پروم ءَ واجہ غلام حیدرءِ لوگءَ ودی بوتگ آئی ءَ وتی بنگیجی وانگ چہ گورنمنٹ ہائی اسکول پرومءَ بندات کرتگ آ یک باز زھین جہد ء ُکوشست کنوکیں نودر برے بوتگ، آرا گوں وتی وانگءَ بے کساس ہبّ ء ُواہگ بوتگ، شہید زاہد آسکانی دانکہ ہشتمی مکتب ء َ پروم ءَ وانیت ء ُدیمترءَ پہ وانگ ءِ ہاترا پنجگور ءَ رؤت دانکہ دہمی مکتب ءَ گورنمنٹ ماڈل ہائی اسکول چتکانءَ سرجم کنت، ایف ایس سیء ُبی ایس سیءَ گورنمنٹ ڈگری کالج پنجگورءَ سر جم کنت ،MA English چہ بلوچستان یونیورستی کوئٹہء َ گوں جوانیں نمبراں سوب مند بیت۔
زاہد آسکانیءِ وانگ سرجم کنگءَ رند مستریں واہشت ہمیش اَت چیزءِ کہ آئیءَ ونتگ آہاں پہ وتی بزگء ُ لاچاریں قومء ُ راجءَ سر بہ کنتء ُدانکہ یک ہدّے ءَ آ وتی کارے تہءَ سوبمند بوت۔
بنداتءَ آئی ءَ وتی پت ء ُ پیرکی ہنکین پروم ءَ یک انگلش لینگویج سینٹر ءِ پچ کرت بلے چوشکہ آیک کوچگی دمگے اَت اودا زند ءِ بازیں آسراتی ءِ دست نہ کپگ ءِ سوب ءَ آئی ءَ وتی ہمے انگلش لینگویج سینٹر بند کرت ء ُ1997ءَ زاہد آسکانی ءَ وتی دیم گوں گوادر ءَ کرت اودا آئی یک پرائیویٹ اسکول بزاں آغاخان اسکول ءِ تہ ءَ یک سوجکارے ءِ جہت ءَ بلوچ پُسّگان ءَ وانینت، زاہد آسکانی ءِ آدت اَت کہ اگاں یک کارے آئی بندات بُکرتیں دانکہ آکار ءِ آسر مہ کرتیں آرام ءَ نہ نشت، ہمے رنگ ءَ شہید سر زاہد آسکانی ءَ 20، مئی، 1999ءَ وتی یک زاتی پرئیویٹ انگلش لینگویج سینٹر ءِ پچ کرت،چہ بازیں رنجء ُآزابی ءَ رند آ وتی اے کارے تہ ءَ سوبمند بوت ء ُآئی جہد ء ُ کوشست آں رنگ آورت بزاں 10، جنوری، 2002 ءَ آئی ءَ وتی یک وانگ جاہ ءِ ”دی اوئیسس اسکول“ ءِ نام ءَ پچ کرت، چہ آئی بازیں جہد ء ُ مہنتاں رند دی اوئیسس اسکول سک نامدار بوت آئی جہدانی برکت ءَ اسکول ءَ انچو رش ء ُ کش بوت کہ 2007 آئی ءَ دومی کیمپس پچ کرت ہمے پیم ءَ دیم ءَ رواں 2008 سیمّی کیمپس ماں سُربندن ءَ ء ُ2013 چارمی کیمپس ماں بکشی کالونی گوادرءَ پچ کرت، اے چارین کیمپسانی تہءَ کساس2500 بلوچ نودر بر وانگ ءَ اِنت ء ُ سرجمیں گوادرءِ تہءَ مستریں ء ُجوانتریں پرائیویٹ اسکول زانگ بیت نہ تہنا گوادرءِ تہءَ بلکیں سرجمیں مکرانءَآئیءَ یک نام ء ُ توار ءِ ہست گوادر ءِ تعلیم ءَ شہید زاہد آسکانیءِ یک جوانیں دستءِ مان انت ء ُگوادرءَ ہمینچو پرائیویٹ اسکولء ُسینٹرکہ ہست انت آہانی گیشتریں سروک شہید سر زاہدآسکانی ءِ نودر بر انت ء ُ شہید ءِ بازیں نوردبرھست جوانیں ادارہء ُجوانیں پوسٹانی سرا کار کنگءَ انت ء ُدگہ بازیں نودربرہست انت کہ ملکی ء ُ درملکی وانگجاہانی تہءَ وانگ ءَ انت۔
”اے وا یک گواچنی انت کہ مروچی گوادرءِ اگاں چک چکے انگریزی گپ جت کنت گڈا آواجہ شہید زاہد آسکانیءِ جہدانی بر کت انت گوادرءِ دیمءَ بروک چُش بُگشاں کہ گوادرءِ تعلیم ءِ بیرک دار واجہ شہید زاہد آسکانی انت گڈا من رد نباں،چیاکہ گوادرءِ تعلیمءِ ہمینچو مٹ ء ُ بدلی آرگ بوتگ آدراہ شہید سر زاہد ءِ جہدانی برکت انت مروچی گوادرءَ ہمینچو لینگویج سینٹر کہ ہست انت آہانی سوجکار ء ُ سروک گیشتر سر زاہدءِ نودربر ء ُ شاگرد بوتگ انتء ُ اےہم یک گوچنی انت کہ کس چرے گپءَ انکار ہم کت نہ کنت کہ واجہءِ بازیں شاگردء، مروچی شریں جاگہءَ کارءَ انت شریں پوسٹانی سرا انت ء ُ بازینے در ملکء ُ ملکءِ تہا مزنین وانگ جاہاں انوں وانگایاں (رژن،53) “
بلوچی لبزانک ءُ شہید سر زاہد آسکانی :بلوچی زبانءُ لبزانکء َ زاہد آسکانی ءِ یک جتائیں نامء ُ توارءِ ھست اِنت چہ اسکولءِ زمانگءَ آئیءَ را گوں بلوچی زبانءُ لبزانکء َ ہُبّ ء ُواہگ بوتگ ء ُ بنداتی زمانگءَ آئی کمو کمو شائری ہم کرتگ، فرانز کافکاءِ دراجیں آزمانک”میٹا مورفو سز“ءِ رجانکءِ پیشدانکءِ تہءَ گوش ایت کہ”منءَ چہ اسکولءِ زمانگءَ بلوچی لبزانکء ِ وانگء ُ زانگءِ ہُب بوتگ برے برے گوں بے سرء ُ پادیں لچّہاں کاگد سیاہ کتگ انت(میٹا مور فوسز7)
زاہد آسکانی چہ اسکولءِ زمانگءَ گوں بلوچی زبانءَ نزیکی کناں ءُ پیداک انت 1999ءَ یک بلوچی ماہتاکےءِ کہ آئی نام ”راستیں راہ“بوتگ زاہد آسکانی اے ماہتاکءِ اولی شونکار بوتگ چہ اسکولءِ زمانگءَ بگر دانکہ وتی زندءِ گڈی وہدءَ گوں بلوچی زبانءُ لبزانکءَ ہمگرنچ بوتگ مدام آئی واہگ ہمے بوتگ کہ ہر بلوچ گوں زگریں بلوچیءَ گپء ُ ہبر بہ کنت چوشکہ آوت انگریزی زبانءِ یک سوجکارءِ بوتگ بلے آئیءَ چہ وانگجاہء ُادارہءَ چے ڈن کدی ہم بلوچی گپء ُ گالانی تہءَ انگریزی لبز کار مرز نہ کرتگ،آئی مدام مردمانءَ ہمے سرءُ سوج کرتگ کہ وتی ہبرانی تہءَ کدی دری لبز کار مرز مہ کن اَت، بلوچی لبزانکء ُادبءِ تہءَ زاہد آسکانی ءَ شیئر،آزمانک،رجانکء ُ تژنء ُ بچکند ءِ تہءَ شور آزمائی کرتگ۔
”واجہ یک زانتکاریں ند کارے بوتگ آئی ءَ آزمانک،شیئر، رجانک بزاں کہ رمء پ لچہددوئیں پڑاں وتی بور تاچینتگ ء ُ مدام دزرسءِ بلوچیءَ دیمءَ برگءِ جہدے کتگ وتی لوگءِ مردم،دوست ءُ ہمبل، ہمراہءُ ہمسائگ، سیادءُ وارث ءُ ایدگہ مردمانءَ بلوچی نبشتہ کنگءِ سکین ئے داتگء ُ سرء ُ سوج کتگ انت، ءُ آئیءِ مدام گشگ ہمے بوتگ ما بائدیں وتی زندءِ درائیں تکء ُ پہناتاں بلوچی زبان ءُ گالوارءَ کار مرز بہ کنیں ء ُ ہر وہدءَ ہمے ہیالءَ بداریں کہ مئے ہبر پلگاریں بلوچیءِ تہا بہ بنت ء ُ شہیدءَ وت ہم ہجبر بلوچی گپءِ نیامءَ انگریزی لبز کارمرز نہ کتگ(رژن،53)“
زاہد آسکانیءَ کم شائری کرتگ بلے وتی شائری ءِ تہءَ چہ وتی ڈیہہ ء ُ راجءَ شمشکار نہ انت آئی شائری ءِ تہءَ دستونکء ُ آزات لچہءِ تہءَ زور آزمائی کرتگ پہ درور یک آزات لچہے۔
”دراں ڈیہہ“
اومنی پرشتگیں مہرءِ مُہریں کلات
او منی زیکءِ ہمراہء ُ بانداتءِ یات
تو مدامی گُشے
کوہنیں گپّاں شموش
پیشی کولاں بہ پروش
ہرچی بہت ءَ نبشتگ ہما ڈول بیت
نوں مئے راہ انت جتا
مئے نگاہ انت جتا
چماں پچ کن بلے کور ببو
گوشاں اِشکُن بلے کر ببو
لنٹاں دوچء ُبکن گنگ زبانء َ وتی
کریں دنیاءِ کورانی اے جنگل انت
تاں کجا رست کنت مئے نزوریں توار
کئے انت سر پد بہ بیت مئے زبانءَ ادا
دوداں قرباں بکنت
نامءَ سرگوز بکنت
چون سر گوست کنت مئے بلوش دابیں دل
مرگءِ بیہار نیست
نامءِ ترس انت ادا
ہر چی جائز نہ انت مہر ءُ جنگ ءِ تہا
اے جھان ئے دگہ
مادراں ڈیہہ ادا
(سسّا،59)“
زاہد آسکانیءَ دستونک ہم نبشتہ کرتگ آئی دستونک سادہ بیانیءِ تہءَ انت آئی دلءِ درداں ءَ گوں ارزانیں لبزاں دستونکءِ رنگءَ کماتگ آ وتی شائری ءِ توکءَ کجام وڑیں یک کلوہء ُ پیگامءِ دیگ بلوٹ ایت مردم گوں ارزانیءَ سر پد بنت پہ درور دستونکےءِ لہتیں بند،
بھتءَ کہ گم نبشتہ چہ کہ گلگ بداریں
زردءَ ما درد کشتہ چہ کہ گلگ بداریں
زندوں وتی کہ ندر کت پہ بے وپائے نام ءَ
دوست ءَ منا شمشتہ چہ کہ گلگ بداریں
نابودی انت منی یااے کارانت قسمتءِ کہ
دو ر کپتگوں من پشتہ چہ کہ گلگ بداریں
نوں ہچ کسءَ مہ ڈوبار او زاہدی تو زان ئے
زرد چہ ہمائی پرشتہ چہ کہ گلگ بداریں
زاہد آسکانیءَ شیئرء ُ شائری ءِ ہواری ءَ رجانک کرتگء ُ نبشتانک ہم نبشتہ کرتگ آئی تژن ءُ بچکند جوانیں رنگےء َ نبشتہ کرتگ،پاکستانءِ جمہوریتءِ سرا یک تژن ء ُ بچکندءِ نبشتہ کنت آگوش ایت پاکستانی سیاست داناں جمہوریتءَ را جمء ُ ہوریءِ متلب داتگ،بزاں یک چیزءِ ورگءِ واستہ جمء ُ ہور بوگ،آگوش ایت
”الحمد اللہ ما پاکستانءِ وڑیں جمہوری ملک ئے ءَ جاہ مننداں،اداہر کار گوں جمء ُ ہوری بوگءَ انت چہ چبراستیءَ بگر تاں وزیر اعظمءَ دراہ گوں جموء ُ ہوریءَ چو کرمءِ وڑا ہمے ڈونڈ (پاکستان)ماں کپتگء ُ ورگاہاں اے کرماں ڈونڈءِ گوشتانءَ ہلاس کرتگ نوں سر اِش ماں ہڈانی تہءَ ایر داتگ۔ہمے ترس انت کہ ہڈانی ہلاس کنگءَ رند باریں اے کرمانی ھال چے بیت(راستیں راہ،تاک1تاکدیم29)“
چوناہءَ اگاں بچارے ہمینچو دزّی ء ُڈنگی بوتگ گیشتر اے دزّی آنی تہء َ دری مردمانی یا ہمساہگانی دست ماں بوتگ بلے اے اولی ملک انت کہ ادے دزہمے ملکءِ مردم انت تژن ء ُ بچکندءِ تہءَ دیمترا زاہد آسکانی نبشتہ کنت،
”مئے جمہوری ملکءَ لوگءِ دُزہما کس انت کہ آوت لوگء ِ پانگ انت،ادا ڈنگ پاسپانءِ جند انت،پسانی گرک پسانی شوانگ انت،زیادہ تر پاکستانی یک وھدےءَ دوڈپٹی دیگاہاں،یک مردمءِ یکیں وہدءَ دُزی ء ُ پانگی ءِ کارءَ سرجم کنگا انت شوانگی ء ُ گرکءِ ڈپٹیءَ ہم یک مردمءِ سر جم کنگا انت،اے کارانی مقصدء ُ پائد گ باز انت،بلے یک خاصیں پائدگءِ ہمیش انت کہ لوگءِ پانگ پمیشہ وت لوگءَ دزی کنت کہ دگہ ڈنی دزےءَ را دزی ءَ موقع مہ رسیت(ہمیش)“
بلوچی لبزانکء ُ ادبءِ تہءَ زاہد آسکانیءِ شرتریں ء ُ جوانتریں پِڑ رجانکاری زانگ بیت، رجانکاری ءِ تہءَ آرا جوانیں رنگےءَ دست رس بوتگ،زاہد آسکانیءَ فرانزکافکاءِ دراجیں آزمانک”میٹا مور فوسز“ تچکءَ چہ انگریزی ءَ ماں بلوچیءَ ترینتگ،اے کتاب 80 تاکدیمءِ سرا انت ء ُ اے کتاب مارچ 2011چہ کلکشان پبلشرز دی او ئیسس اسکول گوادرءِ نیمگءَ شنگء ُ تالاں بوتگ،بلوچی لبزانکء ُ ادبءِ تہءَ زاہدءِ رجانک کرتگیں اولی کتاب انت ۔آبلوچی لبزانکءَ چہ اسکولءِ زمانگءَ واناں ء ُ پیداک انت،بلے اے دؤر ءُ نوبتاں وہدے کہ آانگریزی زبانءَ یک سوجکارےءِ جہتءَ نودربراں انگریزی زبان وانینگءَ اَت گڈا اے مدّتاں آئی انگریزی لبزانک ہم ونت، آئی انگریزی لبزانکءِ وانگءَ رند بلوچی لبزانک دیست گڈا آئی زانت بلوچی لبزانک انگت باز پُشتءَ پشکپتگ اے درگتءَ آکتابءِ پیشدانکءِ تہءَ گوش ایت،
”من وہدے ڈنّی لبزانکی کار انٹرنٹءَ پٹّء ُپول کت انت ء ُ وانگء َ رند گوں مئے بلوچی لبزانکءَ دیم پہ دیم کت انت تہ مار اِت کہ تنے وہدی باز نوکیں لبزانکی کارانی تہرء ُ نبشتہ کنگءِ رہبند ہست کہ ما سرپد نہ ئیں ء ُ پمیشکہ مئے لبزانک چی اے مڈیءَ زبہر انت،اگاں ما اے رہبنداں مہ زانیں ء ُ کار مرز مکنیں مئے زبان پُشتءَ پشت کپیت ء ُ نوکیں زمانگءِ دردءَ نہ وارت،پرچہ کہ زمانگءِ درسیں چیز مدام بدل بوان ء ُ نوک بوان انت ء ُ ہمے وڑا زبانء ُ لبزانک ہم بدل بیت ء ُدیمروی کنت(میٹا مور فوسز،8)“
زاہد آسکانیءَ انگریزی زبانءِ لبزانکءِ سرا یک جوانیں دست رسءِ بوتگ ء ُ پدا انگریزی لبزانک آئیء َ جوانیں رنگےءَ ونتگ بلے وہدءِ کافکاءِ اے دراجیں آزمانک ”میٹا مور فوسز“ءَ وانیت داں اے کسہءِ ڈکشنءَ گند ایت اے کسہءِ تہءَ کافکاءِ درشانداب،نوک تبی ء ُ ھورت چاریءَ گند ایت داں آئی دل گوش ایت کہ ایشیءَ بلوچی زبانءِ تہءَ بہ ترّیناں کہ اے یک نومیں چیزے بیت، فرانزکافکاءِ دراجیں آزمانک”میٹا مورفوسز“کہ زاہد آسکانیءَ ماں بلوچیءَ رجانک کرتگ اے آزمانک ءِ نام ہما وڑا اِشتگ بزاں کہ نام رجانک کنگ نہ بوتگ۔
”میٹا مور فوسزءِ رجانکاری من پمیشہ درچت کہ فرانزکافکاءِ لبزانکی اِزم،درشانی داب،تچک گُشی،نوک تبی ء ُ ھورت چاری وتی مٹ وت انت،کافکاءِ کارست گیشتر آئی جند ءِ زند انت کہ آوت مدام لوگی ء ُ چاگردی ڈالچاریء ُ زبہریءِ دیمپان بوتگ۔آئی کارست ہر وہد ءَ بے گناہءَ سزا دیگ بنت ”میٹامور فوسز“ءِ توکءَ اے شریں رنگےءَ گندگ بیت۔۔۔میٹا مورفوسزءِ بلوچیءَ ترینگءِ یک بلاہیں جیڑہے اے کسہءِ نام ”میٹا مورفوسز“ بوتگ ایشی بزانت انت پہکءَ بدل بوگ بلے بلوچیءَ ایشی دروریں لبز دست نہ کپتگ(بگندے من نزانتگ)پمیشکہ اشی نام ہما وڑا اشتگ
زاہد آسکانیءَررجانکاریءِ تہءَ پہ جوانی دست رس بوتگ،آئی گورا بلوچیءِ ساپ ء ُ سلہیں ء ُارزانیں لبزیات بوتگ آئی گورا رجانکاریءِ بودشت ء ُ کمال بوتگ آئی رجانکاریءِ تہءَ مردم انچو مار ایت گشے زانءَ اے یک وتساچیں ہنرے کہ زاہد آسکانی پیشدارگءَ انت،اگاں بچارے انگریزی زبان یک باز دیمروی کرتگیں زبانءِ زانگ بیت،انگریزی زبانءِ بازیں لبزیاتء ُ ُ گالبندکہ ہست انت آہانی بدل ماں بلوچیءِ توکءَ دست نہ کپ انت بلے زاہد آسکانیءَ چشیں جاہاں گالبندانءَ پروشتگ ء ُ ردانی تہءَ آورتگ کہ پہ بلوچیءِ وانوکانی واستہ ہچ وڑیں اڑء ُجنجال جوڈ مہ بیت۔
”زاہد آسکانی ءِ رجانک ءِ رِدا اے اوّلی تجربت انت، بلے سورس لینگویجءِ ہمراہیءَ ٹارگٹ لینگویجءَ ہاسیں دز رسی ءِ سوبءَ آئی صافء ُسلہہء ُ ارزانیں زبانےءَ رجانک ءِ عمل دیما برتگ۔ ۔ ۔
زاہد آسکانی ءَ اے کسہءِ رجانکءَ بلوچیءِ گشگ وڑ درشان داب ماناءِ سر کنگءَ وتی ساچشتی بودشت ء ُ کمال کار گپتگ انت پمیشکہ رجانکءِ وانگءِ وہدءَ درامدیءِ مارشت ودی نہ بیت بلکیں انچو گمان بیت کہ مردم تچکءَ وتساچیں آزمانکے وانگءَ انت چوشکہ انگریزی یک دیمروی کرتگیں مزنیں زبانے پمیشکہ اودا بازیں گالبندء ُ لبزیات انچین ہم است انت کہ آہانہ بدل لبز بلوچیءِ نہ گواہیت چشیں جاہاں آئی گالبند پروشتگ ء ُردانی دروشم داتگ انت کہ چوشیءَ وانوکءَ پہ رسانکءِ جیڑہ ودی نہ بیت(رحیم مہر،ایم فل تیسز)“
زاہد آسکانیءَ اے کتابءِ رجانکءِ تہءَ شریں وڑےءَ زبانء ُ درشانءِ ہیالداری کرتگ،آئی جہد ء ُ کوشست ہمے بوتگ کہ آگیش ءَ چہ گیش بلوچیءِ پہک ساپیں ء ُ پلگاریں ءُ زگریں لبز کارمرز بکنت دانکہ شریں وڑےءَ بلوچی زبانءِ راہ ء ُ رہبنداں سرپد ء ُ زانتکاربہ باں۔
”زاہد آسکانیءَ اے آزمانکءَ را چہ انگریزی ءَ ترینتگ۔
زبانءُ درشانءِ ہیالداری ہم شریں وڑےءَ کرتگ ئے۔
بلوچی رجانکاریءِ دپترءَ اے جوانیں ٹیکی یے۔چریشی نہ ایوکءَ بلوچی بازیں رپکء ُ راھان چہ آشنا بیت بلکیں وانوک کافکاءِ بیانیہ ء َ چہ آشنا بیت کہ بیانیہ چونیں ھنرے(میٹا مور فوسز،12)“
زاہد آسکانی آزات رجانکءَ زانتکارءُ سرپد انت آئیء َ لبز ٹو لبز ءَ مانا کنگءِ بدلءَ لبزءِ ماناءِ رسانکءِ سرا زور داتگ، آئیءَ زانتگ اگاں تہنا لبزءِماناہءَ دیمءَ بیارے گڈا سرپدیءِ واستہ اڑء ُ جنجال ودی بیت، فرانزکافکاءِ اے دراجیں آزمانک کہ زاہد آسکانیءَ بلوچیءِ توکءَ رجانک کرتگ، بلوچی زبانءَ رجانکاریءِ تہءَ یک گیشی ءَِ زانگ بیت۔
”زاہدءِ گورا آزات رجانکءُ ربیت کہ اودا معناءِ رسانکءِ سرا زور دیگ بوگءَ انت اے کسّہءِ توکءَ بازیں انچیں انگریزی لبز بوتگ کہ آہانی درور بلوچیءَ دست نہ کپتگ ء ُ آہانءَ شریں وڑےءَ پدر کنگءِ ہاترا دراج کش کتگ ۔۔۔۔ہواریں صورتءَ زاہد آسکانی ءِ رجینتگیں کسہ میٹا مور فوسز بلوچی زبانءَ یک انچیں گیشی یے کہ زبانء ُ بیانء ُ جیڑگ ء ُ فکر کنگءِ نوکیں راہء ُدرانی پاچیءِ سوب بیت(ہمیش)“
اگاں بچارے رجانکاریءِ پڑے تہءَ میٹا مور فوسز زاہد آسکانیء ِاوّلی جہد انت آئیءِ واہگ ہمیش اَت کہ بلوچی لبزانکءِ تہءَ ردانکءِ پڑ ہم دیمروی بہ کنت ء ُ دگنیاءِ آدگہ دیمروی کرتگیں لبزانکانی وڑا وانگ بہ بیت آ کتابءِ پیشدانکءِ تہءَ گوش ایت،
”میٹا مور فوسز منی رجانکاریءِ اوّلی جہد انت منی مولء ُ مراد ہمے بوتگ کہ مئے بلوچی لبزانکءِ نثرءِ پڑءَ گوں دگنیاءِ آدگہ دیمرئیں راجاں ہمراہ بہ بیت ء ُ دیمروی بکنت من جہد کتگ کہ اے رجانک ءَ ہرکس ونت ء ُسرپد بوت بہ کنت (میٹا مور فوسز،9)“
زاہد آسکانی انگریزی زبانءِ یک سوجکارے ہواریءَ بلوچی زبان ءُ لبزانک ءِ تہءَ یک سرپدیں ءُ زانتکاریں شائر،نبشتہ کار ء ُ رجانکارے اَت،4، دسمبر، 2014 ءَ بدواہاں ماں گوادرء َ آئی جندے لوگءِ دپءَ آئی سرا تیر گواری کرت ء ُآرا ہمیشہءِ واستہ نمیراں کرت۔
پولکار:فدا موسٰی
