راج آگاہ ءُ سرپد انت نبشتہ کار : گُلناز بلوچ

نبشتہ کار : گُلناز بلوچ

من مُدام سُھب ءَ مھلہ چہ واب ءَ پاد کایاں ءُ ھلک ءِ مردمانی واستا روگنی نان ارزبند ءُ چاھاں گراد آں ، منی کسانیں گْوھار ھلک ءِ گْونڈواں پہ وانگجاہ ءِ روگ ءَ تیار کنت بزاں کسے ءَ پوشاک گور ئِے دنت ءُ کسے ءِ بوٹاں پالیش کنائین ایت بلے چیزے وھد بوت کہ کرونا ءِ نادراھی ءَ وانگجاہ وَ بند اَنت پمیشکا منی گْوھار لوگ ءِ دگریں کاراں کنت گُڑا مات کھول ءَ چاہ ءُ ارزبنداں بَھر کنت۔ پد ءَ چہ اے کارانی ھلاسی ءَ رند ما دوئیں گْوھار نپاداں پیڑ این ءُ ایر کن ایں پد ءَ گِس ءِ باناں روپ اِیں۔ وھدیکہ اے تیوگیں کار ھلاس بنت رند ءَ من وتی گوانکو ءَ پہ ساھتے ءَ دست ءَ کن آں ءُ چاگِردی رسانکدر (وٹس ایپ، پیس بُک ءُ تندجاھاں) کلوہ ءُ ھال ءُ اھوالاں چار آں کہ گیدی ءِ تب ھر وھد چے اَنت ءُ چوناھیگا ھر روچ ھبکّھیں ھال ءُ اھوال گِندگ بنت۔

ھر وتواجہ ءُ آجوئیں راج چہ گِندگُش، وتگُش ءُ روتاکانی آسراتی ءَ وتی راجی روچانی بابت ءَ یک ھپتگے ءَ پیش راج ءَ ھمُک سرپدی ءُ آگاھی دیان بیت کہ آیوکیں روچ چی ئیگ انت پمیشکا آ تیوگیں راج ھما روچانی ارزِشت ءُ بستار ءِ واستا وڑ وڑیں مراگِشاں اڈ کن اَنت ءُ راج ءَ سرپد ءُ پدریچ ءَ وتی راجدپتر ءَ زانتکار کن انت۔ انچوشکہ یک درورے، ھندوستان ءِ رسانکدراں توری گاندھی ءِ بوتن روچ ءُ رپبلک ڈے بِہ بیت یا آئی ءِ آجوئی ءُ 1971 جنگی سوبانی روچ بِہ بنت گُڑا پہ ھمے روچانی بارو ءَ چہ دو ھپتگ ءَ پیش لس مھلوک ءَ سرپدی دے اَنت پمیشکا چہ ساری ءَ اود ءِ مردم وتی ٹویٹر، انسٹاگرام ءُ پیس بُکی چَک ءِ اَکساں ھما روچ ءِ ھساب ءَ بدل کن اَنت۔ بلے ما بلوچاں اے وڑیں آسراتی وَ نیست انت پمیشکا مارا راجی ھستیانی روچ مُدام اناگاہ زانگ بنت چمیشکا پہ چُشیں روچاں ناں کہ ما مراگشے اڈ کت کن ایں ءُ نیکہ راج ءَ گیشتر سرپدی دات کن ایں البت لھتیں راج دوست راج ءَ آگاھی ءُ سرپدی دیگ ءِ ھاتر ءَ چاگِردی رسانکدر ءَ چُشیں روچانی بابت ءَ نبشتانک نبیس انت ءُ لھتیں وتی چَک ءِ اَکساں ھما روچانی آگاھی دیگ واستا بدل کن اَنت ءُ اے جْوانیں گپے۔

مرچی 21 کِرّا اَت ءُ ھرروچ ءِ وڑ ءَ من وتی لھتیں کار ھلاس کت ءُ رند ءَ پیسبُک پچ کت ءُ چار آں کہ ھر دزگْوھار ءُ ھمبل ءِ اَکس بدل انت ءُ ھر کس ءَ دو دو لائین ءِ گالِر نبیس اِت کہ “راج ءَ وتی راجی ھستی، دْرپشوکیں استال ھُدامرزی واجہ زھور شاہ ھاشمی ءِ بوتن روچ مراد بات”
گُڑا من ھم شات ءُ گل بیتگ ءُ زیت وتی چَک ءِ اَکس بدل کت راجی ھستی زھور شاہ ھاشمی ءِ اَکس جت کہ راجی نمیران ءَ یات بِہ کن این ءُ آئی ءِ جُھداں منّ ایں کہ مرچی اے راجی جُھدکار ءُ نمیرانیں سید زھور ھاشمی ءِ جُھدانی برکت انت کہ گلامیں راج ءَ وتی راجی پجّار ءُ ماتی زبان زندگ داشتگ۔ سید زھور ھاشمی ءَ بلوچ راج ءِ تھاریں شپ روژنا کنائینتگ ءُ راج ءَ یک شھدگے داتگ انچوشکہ اگاں راج وتی ماتی زبان ءَ بِہ وان ایت ءُ نبشتہ کنت گُڑا آ راج ءِ مھلوک زبان دوست بنت وھدیکہ زبان دوست بوتگ انت گُڑا آ راج دوست بنت وھدیکہ راج ءِ تہ ءَ راج دوستی ءِ مارشت ودی بوتگ اَنت گُڑا راج وتی گلامی ءَ سرپد بیت ءُ گلامی ءَ پِٹ دنت ءُ وتی آجوئی ءِ جُھد ءَ پاد کیت۔

چوناھیگا بلوچ راج نمیرانیں زھور شاہ ءِ جُھداں باز جْوان سرپد انت، راجی نمیران ءَ ماتی زبان ءِ زگریں گال ماں سیدگنج لبز بلد ءِ دروشم ءَ امبار کتگ ءُ ماتی زبان ءِ زگریں گال چہ گار ءُ بیگواھی ءَ رکینتگ اَنت، ماتی زبان ءِ لبزانکی دیمروی ءِ واستا آئی ءِ بلوچی “سّیاھگ ءِ راست نبیسّگ” ءَ ماتی زبان ءَ یکیں نبشتہ رھبندے داتگ ءُ اَربی ءُ روسی وڑیں بلاھیں زبانانی ڈول ءَ بلوچی نبشتہ کاری چہ گالوار ءَ جتا ئِے کت۔ بزاں ھر بلوچے وتی ھند ءُ دَمگاں گالوار ءِ ھساب ءَ گپ ءُ توار بہ کنت بلے نبشتہ ءِ وھد ءَ ماتی زبان ءِ نبشتہ کاری یکین انت کہ ماتی زبان ونڈ ءُ چُنڈ مہ بیت، ماتی زبان ءِ تیوگیں گالوار توری سلیمانی ءُ رکشانی بِہ بیت یا توری مکرانی گالوار بِہ بیت ماں ھمے یکیں نبشتہ رھبند ءَ نبشتہ بیت۔
نی گِندگ ءَ ایں کہ ھر سال بلوچ راج ءِ مھلوک21 کِرا ءِ روچ ءَ کہ اے روچ واجہ سید زھور شاہ ھاشمی ءِ بوتن روچ انت، ماں چاگِردی رسانکدر ءَ وتی چَکاں زھور شاہ ھاشمی ءِ اکساں ایر کن اَنت ءُ سید ءِ یات ءَ دو سَے وشیں گالرد نبیس انت، ھر سال گیشتر بوان انت۔ چُشیں کاراں راج گیشتر ماتی زبان ءِ نیمگ ءَ کیت ءُ ھندی وانگ ءُ نبیسّگ یلہ کنت۔ ما اُمیت کن ایں کہ راج گیشتر وتی راجی زبان وان ایت ءُ نبشتہ کاری ھیل کنت۔
چوناھیگا مرچی کرونا نادراھی ءِ تُرس ءَ وانگجاہ بند انت ءُ ھر کسے لوگ ءَ دزھُورک انت۔ باید انت ما چہ بلوچی تندجاھاں ماتی زبان ءِ نبشتانکاں وان ایں، گوں سْیاداں گپ ءُ رپ ءِ کلوہ ءُ پیگاماں بلوچی نبشتہ کن ایں ءُ ھما برات ءُ دزگوھار کہ ماتی زبان ءِ نبشتہ بَلد انت آ وٹس ایپی گلاں اڈ کن انت راج ءِ لس مھلوک ءَ ماتی زبان ءَ وانین ایت۔
بلوچی ھست بات ءُ بلوچ زندگ بات انت