پہ بلوچ ءَ جیڑگ لوٹ ایت ( نبشتہ کار: اِمران بلوچ )

چوناھیگا پاکستان ءِ گِندگُش، روتاک ءُ ھر وڑیں رسانکدر مُدام ھمے پوتاری ءَ کن اَنت پاکستان اسلام ءِ سنگر اِنت پمیشکا کُلیں مسلمانانی مُلک پاکستان ءِ گپ ءَ منّ انت ءُ مُدام پاکستان ءَ کُمک کن اَنت. انچوشکہ ھاسکن سھودی اَرب، یو اے ای ، مالیشیا ءُ ترکی ءِ گپ ءَ باز کن اَنت اے ملک پاکستان ءَ مُدام جنگی ءُ ابرمی اپت ءُ اندوھاں پاکستان ءِ کمُک ءَ کن انت۔

البت ما بلوچ وَ زان ایں کہ اے مُلکاں ایوک ءَ پاکستان ءِ کُمک وَ نہ کنگی انت بلکیں اپریکہ ءُ ایشیا ءِ تہ ءَ بازیں بزگ ءُ نیزگاریں مسلمانانی ملک ھست انت انچوشکہ سوڈان، سینگال، لیبیا، اوگانستان ءُ یمن وڑیں بزاں بازیں جنگ جتگیں استان ھست انت کہ اے آیاں ھم کُمک کن انت بلے پاکستان چہ ایشاں پنڈ ایت ءُ وام کنت ءُ آ پاکستان ءَ پنڈ دے اَنت گُڑا پاکستان وتی مھلوک ءِ رَد دیگ ءَ اے پنڈ ءَ کُمک ءِ نام دنت۔ اگاں اے بیستیں مسلمانیں ملکاں ھاسکن مسلمانانی گل او آئی سی ءِ پاکستان ءِ کُمک ھست گُڑا لگوریں پاکستان ءَ ابدالیں کشمیری رَد نہ داتگ ءُ ھندوستان ءَ جنگے کتیں۔

نی اگاں ما بِہ گِند ایں کہ مرچی سرجمیں دگنیا کرونا وائرس نامیں یک بے درمان ءُ بے دوائیں بلاھیں نادراھی یے ءَ گور جتگ کہ اے وائرس ءِ نادراھی پدر کنگ ءِ ٹیسٹنگ کِٹ دیمروی کتگیں ملکاں نہ بوتگ انت بلے نی لھتیناں اڑ کتگ انت۔

اے ٹوھیں کرونا ءِ نادراھی ءَ سندہ ءُ پنجاب ءِ دَمگ ھاسکن پاکستان ءِ بُندری شھر اسلام آباد ءُ راولپنڈی ھم گور جتگ ءُ نادراھی تْرُندی ءَ ودان اِنت ءُ پاکستان انچیں نابودیں مُلکے کہ پہ کرونا ءِ پھریزگ ءَ بُنکّی آسراتی دپوکھے ٹھینت نہ کنت گُڑا نادراھی ءِ پدر کنگ ءِ ٹیسٹنگ کِٹ یک بلاھیں گپے وَ۔

نی بلوچ ءَ جیڑگ لوٹ ایت کہ کرونا ءِ ھلاپ ءَ اے سھودی، ملیشیا، ترکی ءُ کتر پاکستان ءِ کُمک چی ءَ نہ کنگ ءَ انت، چی ءَ چہ درستاں پیش چین ءَ پاکستان ءَ دپوک ءُ ٹیسٹنگ کِٹ داتگ انت۔ اے اسلامی ملک کُج ءَ مُرتگ انت کہ ھُدا آیاں شالا بیران کنات۔

منی بزگیں بلوچ برات ءُ گْوھاراں گپ ایش انت کہ چینی، یھودی، ءُ سِکھ ھما مردم اَنت کہ آ بے سیت ءَ ھچ کس ءَ کُمک نہ کن انت۔ چین ءِ ھمساھِگ اوگانستان، نیپال، بوٹان بنگلہ دیش منگولیا ءُ بزیں وڑ وڑیں بزگیں ملک ھست انت چین آیاں چی ءَ کُمک نہ کنت، چی ءَ پاکستان ءِ کُمک کنت۔

راستی وَ ایش انت کہ چین چہ سال ءُ دھکاں بلوچستان ءِ ابرمی اَمباراں (تَنگَو،تلاہ ءُ سُھر) چہ بلوچ ءَ پُلیت ءُ بارت، سیندک، ریکوڈک ءُ گْوار راج ءِ دیم ءَ اَنت۔

بلوچاں دزبندی انت کہ شُما وت ءَ چہ اے سِلّیں نادراھی ءَ بہ رکین اِت، ھر ساھت ءَ وتی دستاں چہ سابون ءَ شود اِت ءُ بے سیتیں سپراں مہ رو اِت۔ انچوشکہ چین ءِ داتگیں دراھیں آسراتی پہ پنجاب ءُ سندہ ءِ نادراھاں کارمرد بنت کہ پاکستان ھمایانی اِنت گلامیں راج ءِ وارس ھُدا انت ءُ یکیں گلام وت ءَ وت بہ پھریز ایت۔