تیزاپی سیاست ءُ بلوچستان

التاپ بلوچ

جولائی ۲۰۱۴ء ءِ ماہ ءَ بلوچستان ءِ مزن شھر شال ،مستونگ ءَ لھتے ناشراں بلوچ زالبولان ءَ تیزاپ پر ریتک کہ چہ تینزاپ ءِ گرمی ءَ اے گھارانی دست،دیم سُتک اَنت۔ اے وھیل ءَ ھما بلوچ دلءَ سک بژنیگ ءُ پریشان بوت اَنت کہ آرژنائیں دیمروئیں بلوچستانے ءِ جھد ءَ اَنت۔  بلئے جست ایش اِنت کہ اے وھیل ءِ پُشدرءَ چی ھست؟بلوچ چاگرد ءَ کئے اِنت کہ اے رنگیں ترس ءُ بیم ودی کنت؟ ءُ چیا اے وڑیں جاور جوڑ کنگ بیت؟ 

اے ھما بنکی جست اَنت کہ داں اشانی پسو مارا دست مہ کپ اَنت ما مرچیگیں جاوراں سرجمی ءَ پھم اِت نہ کن اِیں ۔ مرچی انچوش کہ تیوگیں دنیا سرپد اِنت کہ بلوچ راج ءَ جنزے بندات کتگ ۔ اے جنز اگاں چہ مرچی بندات نہ بوتگ ءُ اشی روتگ تاریخی حوالہ ءَ دور اَنت بلئے مرچی اے جنز انچش دیم ءَ شتگ کہ ھر لوگ،ھر بلوچ اشی ءَ اثر مند کتگ ۔ ءُ اگاں ما دنیا ءِ اندگہ آجوئی ءِ جنزاں بہ چار اِیں تہ استعماری،قابضہ گیر قوتاں ھما چاگرداں ھرچی ناروائی ءُ سلکاری کہ کتگ،مرچی ماں بلوچ ڈیھ ءَ ھما سلکاری چہ استعماری قوت ءِ نیمگ ءَ بوگ ءَ اَنت۔اگاں ما فرانز فینن،پائولوفریرے ءِ

نبشتھاں بہ وان اِیں یا ھما جنزانی تاریخ ءَ دلجمی ءَ چمشانک بہ دئے اِیں تہ اے ھبر پدر بیت کہ مرچی ھما جاور کہ بلوچستان ءَ دیم ءَ آیگ ءَ اَنت،اندگہ چاگرداں اُوں بوتگ اَنت۔

اے ھبر مئے واستا بژن ءِ ھبر اِنت کہ مئے مات ءُ گھار وتی چاگردءَ ھچ رنگ ءَ محفوظ نہ اِنت بلئے وشی ءِ ھبر ایش اِنت کہ تو ھمنکس کامیاب بہ ئے تئی دژمن ءِ ھوش ءُ سار ھمنکس گار بووان بیت ءُ دژمن تئی ھلاس کنگ،تئی دود ربیدگ ءِ بیگواہ کنگ ءُ تئی روایتان ءَ ولگوج کنگ ءِ ھاترءَ ھما کاراں کنت کہ دژمن وت ولگوج بیت۔ بلوچ زالبولانی سرءَ تینزاپ جنگ ءِ مستریں مول و مرادھمیش اِنت کہ بلوچ چاگرد ءُ بلوچستان ءَ یک ترس وبیمے ودی بہ کن اَنت ۔ چیا کہ بلوچستان ءِ زالبول وانگ ءُ زانت ءِ پڑءَ مرچی سک دیم ءَ روگ ءَ اَنت ءُ وتی چاگردی،سیاسی،راجی ھقاں شری ءِ سرءَ سرپد بوتگ اَنت،بلوچ زالبول گوں وتی برات ءُ پتاں انوگیں جاوراں سیاسی ،لبزانکی،علمی پڑءَ ھمکوپگ اَنت ءُ جھد کنگ ءَ اَنت۔

زانتکارے ءِ گشتن اِنت کہ " وانندھیں ماتے،وانندھیں راجے،جوڑ کت کنت ۔ ھمے ھاترءَ بلوچ زالبولاں دژمن ءِ کیمپ ءِ مردم ڈوبار اَنت، ترسین اَنت ءُ اے رنگیں جاور دیم ءَ کار اَنت داں کہ بلوچ پُشت در پُشت ءَ زانت ءِ پڑءَ سَنٹ جوڑ بہ بیت ۔ اے سلکاریاں مئے چاگرد ءِ ھما سلکار کن اَنت کہ وت ءَ وت نیکراھی {مذہب} ءِ ٹھیکیدار گش اَنت  ۔ بلئے مذہب اسلام وانگ ءُ زانگ،ءُ وتی حق ءِ گرگ ءِ جھد ءِ پلہ مرزی ءَ کنت ۔ اسلام ءِ اگاں پہ جوانی ءَ یکے اسٹڈی ءَ بہ کنت تہ اسلام ءِ تہ ءَ زالبول ءِ حق سک باز اَنت ۔

ھمے دروشم ءَ بلوچ دود ءُ ربیدگانی تہ ءَ ءُ بلوچ تاریخ ءَ کسے چمشانک بہ دنت تہ اے ھبر پدر بیت کہ بلوچ اوں چہ اسلام ءَ پیسر ھمے حقاں وتی چاگرد ءِ زالبول ءَ دئیگ ءَ اِنت۔ءُ اے ھبرءَ یک بلوچے شری ءَ پھم اِت کنت کہ بلوچ چاگرد ءَ بلوچ زالبولانی کرد ءُ چاگردی بستار چی اِنت۔ اگاں ھما نیکراھی ٹھیکیدار کہ دژمن ءِ دستاں وتی بلوچیت،وتی مسلمانیت ءُ ایمان ئِے بھا کتگ ،اگاں آئیءَ بلوچ زالبولانی کرد،پوشاکءُ یک غیر اسلامی رواجے ءِ سرءَ اعتراض اِنت ھما ھبر دیما آرگ بہ بیت داں کہ چاگردءِ مردم بہ زان اَنت کہ واقعی اے مئے ردی اِنت۔ بلئے منی ھیال ءَ بلوچ زالبول چہ ھزاراں سال ءُ چہ اسلامی کلچر ءَ پیسر ھما روایت ءُ مھکمیں کلچرءَ گوں بندوک اَنت کہ اسلام ءِ آیگ ءَ پد اسلامی اسکالر ءُ پیگمبراں زرتگ اَنت ۔ بلوچ زالبول ءِ پوشاک چَہ دنیا ءِ کلیں پوشاکاں جلوہ ناک تر ءُ سِتر اِنت ءُ غیر اسلامی نہ اِنت ۔ ھمے رنگ ءَ بلوچ زالبولانی وانگ،نندگ ءُ پادایگ وتی ھزاراں سالی کلچر ءِ درانگازیءَ کنت کہ ھچ ملا ءُ مذھبی اسکالر اشی ءِ سرءَ ایراد گیری کُت نہ کنت۔ گڑا جست ایش اِنت کہ اگاں بلوچ کلچر اینکس سرریچیں کلچرے گڑا ھما مردم کہ بلوچ زالبولاں ترسین اَنت ءُ آھانی دیمءَ تینزاپ جن اَنت آ کئے اَنت،ءُ آہانی ٹاسک چی اِنت؟ 

اے ھما ناھاریں قوت اَنت کہ بلوچ راج ءِ ترقی ءُ دیم ءَ روگ ءَ بیم کن اَنت ۔ اشانی ترس ھمیش اِنت کہ اگاں بلوچ زالبول وانندہ بہ بیت دنیا ءِ شَر ءُ ھراب ءَ سرپد بیت،وتی حق ءَ سرپد بیت،ءُ اگاں بلوچ زالبول وتی حق ءَ سرپد بوت گڑا وتی زھگ ءَ کہ لیلو دنت،اے زھگ اوں وتی حق ءَ سرپد بیت ءُ مرچی کہ راج ءَ وتی حق ءِ واستا مزنیں جنگے بندات کتگ مرچیگیں جاوراں دژمن ءِ واستا وانندھیں بلوچ ءُ حاس وانندھیں بلوچ زالبول سک ترسناک جوڑ بیت ۔ چیا کہ وانندھیں زالبول وتی پدریچاں ذھنی حوالہ ءَ گیشتر پُھتہ جوڑ کنت ۔ ھمے ھاترءَ مرچی اے ریاست ءِ مُھرہ{نیکراھی ٹھیکیدار} بلوچ چاگردءَ یک بیمے دور دئیگ لوٹ اَنت کہ بلوچ زالبول چہ زانت ءُ زانگ ءَ دور بہ بنت۔ 

چہ تینزاپی کرد ءَ پیسر ماں پنجگورءَ ھمے دستاں زالبولانی وانگ ءِ سرءَ اوں پابندی جت۔اے ھما کار اَنت کہ یک کامیابیں آشوبی چاگردے ءَ دژمن ریاست مدام ھر چاگرد ءَ اے رنگیں  جاور جوڑ کنت ۔ پمشکہ اے ھبر سد درسد راست اِنت کہ بلوچ راجی جنز وتی کامیابی ءِ سیمسراں سر بووگی اِنت ءُ دژمن وتی ھر ھُنرءَ بے سوب بوگ ءَ اِنت۔ مرچی ما ایوکءَ شال،مستونگ ءِ بلوچ زالبولانی ھلاپ ءَ ریاست ءِ کارندھانی ،،تینزابی،،سیاست ءَ جنز ءِ ھلاپ ءَ بدیں پالے مہ لیک اِیں بلکیں بلوچ چاگرد ءِ تہ ءَ اوں انچیں دگہ قوت ھست اَنت کہ راج ءَ تپاکی ءُ جنزءَ منزلے ءَ سر بووگ ءِ کارانی تہ ءَ پینگ جنگ ءَ اَنت۔ءُ راج ءَ بھر ءُ بانگ کنگ ءَ اَنت۔

مارءَ چراے قوتاں ءُ چَہ اشانی راجدوستیں ملاھاں اوں ھیال گور کنگی اِنت ۔ چیا کہ اگاں ما دنیا ءِ آشوبانی تاریخ ءَ بہ چار اِیں تہ استعماریت ءِ لھتے کارانی تہ ءَ یک وڑیں ھُنر ءُ ھیلہ ھست اَنت ۔ پہ درور ایش کہ ھما سرزمین کہ استعمار ءُ سامراج ءِ دست چیرے قوتاں وتی کتگ اَنت،اُود ءَ اگاں ھما زمینءِ واھنداں وتی آجوئی ءِ جھد بنا کتگ،گڑا استعماری قوتاں اُود ءَ بازیں قبیلہ،بازیں سیاستدان،بازیں لبزانت ءُ طالب علم{نودربر} بھا زرتگ۔ ھما زمین ءِ اصلیں وارث بھرءُ بانگ کتگ اَنت،ھما زمین ءِ لھتیں ٹک{قبیلہ}وتی پلہ مرزی ءِ ھاترءَ تربیت داتگ اَنت۔ءُ جھدکارانی ھلاپ ءَ کارمرز کتگ اَنت ۔ 

باز کواسانی گشگ اِنت کہ  چاگردےءَ پرشت و پروش،تکانسری چاگردی آشوب ءِ نشانی اَنت،بلئے اگاں ما اے حبرءَ پوہ بہ بہ اِیں گڑا اے نشانی پہ ما آشوب آئورت کن اَنت،ءُ اگاں ما پوہ نہ بوت اِیں گڑا اے نشانی راج ءَ بھر ءُ بانگ کن اَنت ۔ اے تینزاپی سیاست ءَ ایوک ءَ دژمن مئے پروش دئیگءَ دیم ءَ  بُرت نہ کنت داں کہ ما دژمن ءِ اخلاقی،افرادی ،نبشتہ ئی کمک ءَ مہ کن اِیں۔ مئے ھر عمل کہ پہ زانت یا نزانتکاری گوں ما بیت آ مرچیگیں دورءِ تہ ءَ سک اھم اِنت۔ اگاں ما بلوچ چاگردءَ گوں اے ریاست ءِ اندگہ بھرانی چاگرداں  دیم پہ دیم بہ کن اِیں تہ اے ھبر پدراِنت کہ مئے چاگردءَ اگاں مرچی نزوری یے اتکگ گڑا اے ریاستءِ سلکاریانی اثر اَنت ۔ باز مردم گش اِیت کہ ما{بلوچ راج} قومی نرگسیت ءِ شکار اِیں ءُ دگہ ھچ کس ما مان نہ یار اِیں۔ من گشاں کہ لھتے معاملاتاں چوش نہ اِنت،مئے راج ھزاراں سالی گلامے،وانگ ءُ زانگ ءُ راجی وت واجھی نہ بوگ ءِ سوب بوتگ کہ مئے چاگرد دری زوراکانی داتگیں کلچرءِ سوب ءَ پولنگ بوتگ ۔ اصل ءَ اگاں تو وت واجہ بہ بَہ ئے تہ دنیا ءِ تہ ءَ یک رول ماڈلے جوڑ بہ ئے،بلئے اشی ءِ واستہ یک شرطے ھست ،آشرط ایش اِنت کہ ما وتی ذاتی ءُ قبیلہی ::انا::ایگوءَ پاھو بہ دئے اِیں،اگاں نا گڑا  مئے بیگواھی،دائمی گلامی،ءُ پروش ورگ ءِ واستءَ دژمن ھرچ دار نہ بیت بلکن ما شما وت چاکرءُ گھرام ءِ کسہ ءَ نوک کن اِیںءُ برات کشی ءِ نوکیں کسھے ساز اِیں داں دائم ءِ گلامی ھمے رنگ ءَ برجم بیت ۔ پمشکہ مرچیگیں ھر میدانءَ دژمن ءِ ،،تینزاپی،،سیاست ءِ دیم ءَ دارگ ءِ واستا مارا سنجیدہ بووگی اِنت ءُ وتی سیاسی،قلمی،علمی قوت ءِ ٹوپانی دیم ءَ گوں یکیں دژمن ءَ بہ کن اِیں۔

23جولائی 2014 بام ھال