رجانک : سئید رئیسی
ھاکمے گوں وت جیڑگ ءَ ات کہ باریں دنیا ءِ سِل تریں چیز چے انت. آئی ءَ وتی کِر ءُ کَش ءِ مردم جست گپت انت، ھر یکے ءَ یک پسو ئِے دات . یک روچے ھاکم ءَ وتی وزیر ءَ گوشت : برو منی سجھیں ڈیھ (مُلک) ءَ بہ گَرد ، منی راج ءَ اے باروا جُست بہ گر . راستیں پسو ءَ وَدی کن. اگاں راستیں پسو ءَ بیار ئے من ترا وتی ملک ءُ مال ءِ نیم ءَ دے آں .
وزیر رھادگ گِپت . آ ملک ءِ سجھیں جاھاں شت. آئی یک سالے پہ اے کار ءَ گوازینت . گیشتریں مردمانی پسو ایش اَت کہ بنی آدم ءِ لانکبوج (گیت، گوت) دنیا ءِ سلتریں چیز اِنت.
وزیر سَدک بوت کہ پسّو ئِے ھمش اِنت. آ ھاکم ءِ نیمگ ءَ واتر بوت .
یک جاھے آئی ءَ شپانکے دیست. گوں وت گوشت ئےِ شپانک ءَ ھم اے بابت ءَ جست گر آں . آئی ءَ گوں شپانک ءَ وتی پجار کت ءُ وتی تَرّ ءُ گرد ءِ مول ءُ مراد ھم درشان کت .
شپانک ءَ گوشت من تئی جست ءِ پسو ءَ زاناں ، اے پسوے کہ تو گْوشگ ءَ ئے پَھک رد اِنت ، ھاکم ءِ نیمگ ءَ ترا ھِچ نہ رس ایت. آئی ءَ گوشت ؛ من ترا راستیں پسو ءَ گْوش آں بلے پیسر ءَ من ترا ڈَکّے ( بَے /شرطے) گِر آں. ڈک ایش انت کہ ترا وتی لانکبوج ورگی اِنت.
وزیر گزبناک تَر اِت، آئی ءَ وتی زَھم کش ات کہ شپانک ءَ تل بہ کنت. شپانک ءَ گوشت : تو من کُشت کن ئے بلے ایشی ءَ دلجم بہ بو کہ تئی پسو رَد اِنت. منی کشگ ءَ ترا ھچ نہ رس ایت. تئی سال ءِ سجھیں جُھد بے سوب بیت .
وزیر ءَ ھیال کت اگاں شپانک ءِ گپ راست بہ بیت ، ھاکم ءِ ملک ءُ مڈی چہ دست ءَ ئِے رو اَنت. پہ شپانک ءِ پسو ءِ گِرَگ ءَ آئی ءَ چم بست اَنت ءُ وتی لانکبوج وارت اَنت...
شپانک ءَ گوشت : دنیا ءِ سلتریں چیز ھِرس ءُ تماہ ءُ مال ءِ لالچ اِنت کہ پہ آئی ءَ بنی آدم ساڑی بیت سلتریں !! کار ءَ بہ کَنت .
