سارہ
شُگفتہ / رجانک:
مجید عاجز
منی پِت بْرھنگ اَت
من وتی پُچ کشّ اِت ءُ آئی ءَ داتنت
زمین ھم بْرھنگ اَت
من آ گوں وتی بان ءَ پیوست کت
لَجّ ھم بْرھنگ اَت
من آئی ءَ چمّ داتنت
تُنّ ءَ سمارے دات ءُ
لُنٹان ءَ جھلادیں شھجوے ءَ کِشت
موسم ءَ ماھے گون اَت ءُ چَکَرّگا اَت
من موسم ءَ پولنگ داتنت ءُ ماہ آجو کت
چہ گوراس ( چِتا )َ ءِ دُوتّاں من انسان جوڑ کت
ءُ آئی ءِ دیم ءَ وتی دل ایر کت
آئی ءِ لَبز کہ آئی ءَ وتی بوتن ءَ گچین کت ءُ
گُشت
من تئی چُکدان ءَ اجکّہی یے گِنداں
آس کہ چہ منی بدن ءَ دُور بوت
گڑا من وتی گُناہ تاپت اَنت
من ماتے بووگ ءَ پد ھم جنین چُکّے ( نیانی یے ) بوت آں
منی مات ھم نیانی یے بوت
نوں تو نیانی ئیں ماتے ءِ اجکّہی ئے
من ماں گوراس ءَ دراہیں موسماں مانداراں
من تئی تھا ارواھے اُپّ کت
نوں من تئی موسماں شیزارگی آں
ھاک چے جیڑیت؟
ھاک ساھگ جیڑیت ءُ
ما ھاک ءَ جیڑیں
تئی نہ منّگ منا زند دنت
ما دْرچکانی عزاباں بہ سگّیں
یا
رنجانی جنڈیں پوشاکاں بہ پوشیں
